Sakopo 1 - Tosi Tapu

¹ Ko au Sakopo, ko le tagata fakasausau a le Atua ti mo le Aliki ko Sesu-Kilisito, ki faasiga e kau agafulu tupu lua ala e mavetevete mamao, alofa atu !

Taulaga o le asiasii

² Ei oku fetaina, ke kotou tio ki asiasii kesekese ala e feala ke kotou felavei ia ofaipe se fiafia lasi,

³ talie ke kotou iloa e fakatupu e le asiasii o lakoutou tui le kataki fualoa.

⁴ Kae e tonu ke fakasoko e le kataki fualoa lana gaoi, o tupu ke kotou malie tukupau mo katoa, ti ke aua na puli se nea ia koutou.

⁵ Kapau e mativa se tasi ia koutou i le poto, ke kole e ia a ia ki le Atua, leia e soli lasi ki tagata fuli, sala valoki, ti e soli loa a ia kiate ia.

⁶ Kae e tonu ke kole e ia a ia i le tui, sala lotolotolua, talie ko leia e lotolotolua, e tatau a ia mo piau o le tai, ala e fetaaki mo feaveaki e le matagi.

⁷ Ke aua na manatu le tagata lena e tali loa e ia se nea mei le Aliki :

⁸ talie ko se tagata loto noa a ia mo mou loto i ona ala fuli.

⁹ Ke fiafia le taina mativa i lona siki e le Atua.

¹⁰ Kae ke fiafia le taina mou koloa i lona tuku ki lalo ; talie e molei loa a ia ofaipe le se o le vao.

¹¹ E fanake le laa mo lona vevela lasi, o fakagini le vao, ti na vilo lona se, ti na puli ai lona fulumalie. E tatau foki mo le tagata mou koloa, e puli loa a ia i loto malie o ana gaoi fuli.

¹² Manuia le tagata leia e kataki fualoa i le asiasii ; talie, ka oki loa lona asiasii, e tali loa e ia le pala o le mauli, leia na fakapapau e le Aliki kia latou ala e alofa kiate ia.

E leaise au fakasala mei le Atua

¹³ Ke aua na pati se tasi mo ka e fakasalai a ia : Ko le Atua leia e fakasalai ia au. Talie e leaise feala ke fakasalai le Atua e le veli, ti e leaise fakasalai e ia se tasi.

¹⁴ Kae e fakasalai le tagata mo ka kua taki a ia mo fakasolosolo a ia e lona oli totonu ;

¹⁵ Ti ka faitoe le oli, e fanaui loa e ia le agasala ; ti ka katoa le agasala, e fanaui loa e ia le mate.

Kae au kalasia malilie tukupau mei le Atua

¹⁶ Aua na kotou fai sala, ei oku fetaina alofaina :

¹⁷ Ko kalasia malilie fuli ti mo nea alofa malilie tukupau fuli, e lotou ifo mei aluga, mei le Tamana o malama, leia e leaise toe fetogi pe moumou lakaga.

¹⁸ Na fakatupu e ia tatou ki le folafola o le maoki o mulimuli ki lona finegalo, o tupu ke tou liliu ko le kau uluaki tupu o lana kakai.

¹⁹ Ke kotou iloa le nea leinei, ei oku fetaina alofaina : ke fakalogologo vave a tagata fuli, ke aua na masau vave, ke aua na itaita vave ;

²⁰ talie e leaise fakasoko e le ita o le tagata le faitotonu o le Atua.

²¹ Koia ke kotou tiaki ai a nea kelekele fuli ti mo agaveli fuli, kae kotou tali i le loto malu le folafola leia kua to ia koutou, leia e feala ke fakamauli ia okoutou laumalie.

Ke fai le folafola

²² Kotou fai le folafola, kae aua fai na gato i lakotou logo ki ai, o kotou kakai ai koutou totonu ki ni fakakaukau sala.

²³ Talie, kapau e logo se tasi ki le folafola kae e leaise fai e ia a ia, e tatau a ia mo se tagata leia e tio i se tiloata kiate ia totonu,

²⁴ ti ka oki lana tilotilo, e ano a ia ti e galoi aifai e ia lona anoaga totonu.

²⁵ Kae ko leia e tio loloto ki le lao saosaoa, lao o le lauatea, ti e kataki fualoa o fai mau a ia, ti e leaise loto galogalo kae gaoi, ko ia lena e manuia loa i lana gaoi.

Ko le tausi lotu maoki

²⁶ Kapau e manatu se tasi e tausi lotu a ia, kae e leaise taofi e ia lona alelo, mo kakai e ia lona loto totonu, e leaise aoga le lotu o le tagata lena.

²⁷ Ko le lotu leia e mea mo lee mele i mua o le Atua ko le Tamana, ko le fakatele ki fanau sala matua mo lokonui i olatou mamae, ti mo le fakamamao mei nea kelekele fuli o le malama nei.