Sakalia 7 - Tosi Tapu

Le sesunio maoki mo le sesunio loi

¹ I le fetuu fa o le sau ko Taliusi, na tuku loa le folafola a le Eteleno kia Sakalia, i le aso fa o le masina iva, leia ko le masina o Kiseleu.

² Na kakau loa e le kakai o Petele a Saletesele mo Lekemi-Meleki ti mo ni iki ake ke ano o faikole ki le Eteleno,

³ mo vesili ki le kau tagata faisakilifisio o le fale o le Eteleno o kau tau, ti mo le kau polofeta : Pe tonu ke kau tagi mo sesunio i le masina lima, ofaipe le nea leia na kau fai i ni fetuu mauke ?

⁴ Ti na tuku mai loa kiate au le folafola a le Eteleno o kau tau, o pati :

⁵ Pati ki le kakai katoa o le fenua ti mo le kau tagata faisakilifisio : I lakoutou sesunio mo fetagisi i le masina lima mo le masina fitu, talu mei fetuu e kau fitu, pe na kotou sesunio kiate au ?

⁶ Ti ka kotou kai mo inu, pe leaise ko koutou ala na kai ti mo inu ?

⁷ Pe leaise kotou iloa a folafola ala na fakasa e le Eteleno i ana kau polofeta mua, i le temi leia na nofoi ai mo fimalie ai Selusalemi mo ona kolo liliki fuli, ti na nofoi ai foki mo le potu saute mo le potu toafa o le fenua ?

⁸ Ti na tuku loa le folafola a le Eteleno kia Sakalia, o pati :

⁹ Na folafola le Eteleno o kau tau, o pati : Ke kotou fakamaau i le faitotonu, Ti ke kotou maua le agamalie mo le manavaalofa ia koutou.

¹⁰ Aua na kotou fakamakeke le fafine lokonui mo le fanau sala matua, mo le matapule, ti mo le mativa, Ti aua na kotou fakakaukau i okoutou loto se nea veli ia koutou.

¹¹ Kae na lotou patigataa o leaise lotou fakalogo, ti na lotou titua o tapono olatou taliga ke aua na lotou logo.

¹² Na lotou fakafefeka olatou loto ofaipe se fa taimane, ke aua na lotou fakalogo ki le lao mo folafola ala na fakasa kia latou e le Eteleno o kau tau i lona Laumalie i ana kau polofeta mua. Koia na ula ai le sausau lasi o le Eteleno.

¹³ Ka kalaga loa le Eteleno, na leaise lotou fakalogo : Koia e pati ai le Eteleno : na leaise kau fakalogo kia latou mo ka lotou kalaga mai kiate au.

¹⁴ Koia na kau fakamavete ai loa latou i lotolotoga o puleaga fuli ala na leaise lotou iloa. Koia na kau maumaui ai le fenua i olatou muli, ti na leaise toe ano loa se tasi i ai. Ti na liliu loa le fenua fulumalie lena ko se toafa.