Sakalia 6 - Tosi Tapu

Tio o saliote e fa

¹ Na kau toe siki ake loa oku mata, o tio, ti ko leinei, na ulu loa ni saliote e fa mei le vasa o mauga e lua ; ti ko mauga ko ni mauga sila.

² I le uluaki saliote na i ai ni osi kula, i le lua saliote ni osi uli,

³ I le tolu saliote na i ai ni osi tea, i le fa saliote ni osi pulepule kula.

⁴ Na kau masau loa, o pati ki le aselo leia na masau mai kiate au : Kolea, ei loku aliki ?

⁵ Na tali mai loa le aselo kiate au : Ko matagi ana e fa o le lagi, ala e ulu mei le ganea leia e lotou tutuu ai i mua o le Aliki o le malama nei katoa.

⁶ Na ano loa a osi uli ala na sai ki le tasi saliote ki le potu noleto, ti na muli ia latou a osi tea ; kae na ano loa a osi pulepule kula ki le fenua o le potu saute.

⁷ Na ulu loa ki fafo a osi kula, o kole ke lotou ano o folii le kele. Ti na pati loa le aselo kia latou : Kotou ano o folii le kele ! Ti na lotou folii loa le kele.

⁸ Ti na fetapa mai loa a ia kiate au, o pati : Tio, ko latou ala kua ano ki le fenua o le potu noleto e fakavilo ia loa loku sausau ki le fenua o le noleto.

Kikite o Kilisito, sau mo tagata faisakilifisio

⁹ Na tuku mai loa le folafola a le Eteleno kiate au, o pati :

¹⁰ E ke tali loa a nea alofa mei le kau popula i lima o Eletai, mo Topisa ti mo Setaesa, ti e ke ano totonu loa i le aso lena ki le fale o Sosiasi, vosa o Sofoni, leia na lotou ano ki ai i lalatou tau mei Papilone.

¹¹ E ke too loa se siliva mo se aulo, ti e ke fau loa ki ai ni pala, ala e ke teki loa ki le ulu o Sosue, vosa o Sosatake, ko le tagata faisakilifisio lasi.

¹² E ke pati loa kiate ia : Ko leinei le folafola a le Eteleno o kau tau : Tio ki se tagata leia e igoa ko Somo ; e somo ake loa a ia i lona ganea, ti e fakatuu loa e ia le fale tapu o le Eteleno.

¹³ E fakatuu loa e ia le fale tapu o le Eteleno ; e tau loa e ia a fakamailoga o le pule fakasau ; e ekeeke loa a ia i lona ekeekeaga fakasau o pule ki le kakai ; e faisakilifisio loa a ia i lona ekeekeaga fakasau, ti e fakatasi malie loa a nea ana e lua iate ia.

¹⁴ E tuku loa a pala i le fale tapu o le Eteleno mo fakamanatu o Eletai, mo Topisa, mo Setaesa, ti mo Eni, vosa o Sofoni.

¹⁵ E au loa mei mamao ni kakai o gaoi i le fale tapu o le Eteleno ; ti e kotou iloa loa kua kakau mai au kia koutou e le Eteleno o kau tau. E soko loa le nea lena, mo kapau e kotou fakalogo ki le leo o le Eteleno, lokoutou Atua.