Sakalia 5 - Tosi Tapu

Tio o le takaiga tosi

¹ Na kau toe siki ake loa oku mata, o tio : ko leinei, na i ai se takaiga tosi leia na lele.

² Ti na pati mai loa le aselo kiate au : Kolea le nea leia e ke tio ki ai ? Na kau tali loa : E kau tio ki se takaiga tosi leia e lele ; na meta kau agafulu lona loa, ti na meta lima lona lau lasi.

³ Na pati mai loa a ia kiate au : Ko le tosi lena o le malaia leia e mafola loa ki le fenua katoa. Talie e tuu i le tasi fetuu e kapu loa a tagata kaia fuli mei le fenua leinei, ti e tuu i le tasi fetuu e toe kapu foki latou fuli ala na fai fakapapau loi mei le fenua leinei.

⁴ E pati le Eteleno o kau tau : E kau liligi a ia ke ulu ki le fale o le tagata kaia ti mo leia e fakapapau loi i loku suafa, o tupu ke nofo i ai o maumaui a nea fuli o kaku ki papa mo fatu.

Tio o le agaveli a Suta

⁵ Na fakafeofi mai loa kiate au le aselo leia na masau mai kiate au, o pati mai kiate au : Siki ou mata, o tio ki le nea leia e malaga mei leia.

⁶ Na kau tali loa : Kolea ? Ti na pati mai loa a ia : Ko le kulo lena. Ti na toe pati loa a ia : Ko le kulo lena kua tanaki ai a agasala o le fenua katoa.

⁷ Ti ko leinei, na malaga ake loa se potu pulu mamafa leia na tapono ki ai le kulo, ti na kau tio loa ki se fafine leia na tonatona i loto o le kulo.

⁸ Ti na pati mai loa le aselo kiate au : Ko le agaveli a ia. Ti na tulei loa e ia le fafine ki le loto kulo, kae toe tapono loa e ia a ia ki le potu pulu mamafa.

⁹ Na siki ake loa oku mata, o tio : ko leinei, na sa mai loa ni fafine e toka lua ala na lele i le matagi. Talie na i ai ni ola kapakau ofaipe kapakau o le amatuku. Na la too loa le kulo o ave ki le vasa o le kele mo le lagi.

¹⁰ Na kau pati loa ki le aselo leia na masau mai kiate au : E la ave loa kifea le kulo ?

¹¹ Na tali mai loa a ia kiate au : E la ano o fakatuu se fale kiate ia i le fenua o Sinea ; ti ka oki loa a ia, e la teki loa le kulo ki lona tuuaga.