Sakalia 4 - Tosi Tapu

Tio o le tekiaga malama aulo mo oliveto e lua

¹ Na toe au loa kiate au le aselo leia na masau mai kiate au, o fafagu au ofaipe se tagata leia na fafagu mei lana moe.

² Na pati mai loa a ia kiate au : Kolea le nea leia e ke tio ki ai ? Na kau tali loa : E kau tio, ti ko leinei, e i ai se tuuaga malama leia na aulo saosaoa katoa, mo se nea tanaki lolo i aluga. Na maga fitu le tuuaga malama, mo ni tafeaga lolo e fitu ki malama e fitu ala i le tumutumu o le tuuaga malama ;

³ Ti na tuu feofi i ai ni oliveto e lua, ko le tasi i le fetuu atamai o le tanakiaga lolo, ti mo le tasi i lona fetuu sema.

⁴ Na kau masau loa, o pati ki le aselo leia na masau mai kiate au : Ei loku aliki, kolea le uiga o nea anei ?

⁵ Na tali mai loa kiate au le aselo leia na masau mai kiate au, o pati : Pe leaise ke iloa le uiga o nea anei ? Na kau pati loa : Leai, ei loku aliki.

⁶ Ti na toe masau mai loa a ia kiate au, o pati : Ko leinei le folafola leia e tuku e le Eteleno kia Solopapele : E leaise ko le fakamakeke pe ko le makeke, kae ko loku Laumalie, e folafola le Eteleno o kau tau.

⁷ Ko ai a koe, mauga lasi ? E ke lapa loa i mua o Solopapele ! E teki loa e ia le fatu tafito i loto malie o ni kalaga fakafiafia : Kalasia, kalasia kiate ia !

⁸ Na toe tuku mai loa kiate au le folafola a le Eteleno, o pati :

⁹ Kua teki e lima o Solopapele le fakatafito o le fale leinei, ti e toe fakaoki loa a ia e ona lima ; ti e ke iloa loa na kakau mai au e le Eteleno o kau tau kia koutou.

¹⁰ Talie ko latou ala na nukinuki ki le aso o ga kamataaga liliki e fiafia loa i le tio ki le nivo i le lima o Solopapele. Ko malama anei e fitu ko mata o le Eteleno, ala e taka i le malama nei katoa.

¹¹ Na kau masau loa, o pati kiate ia : Kolea le uiga o oliveto anei e lua, i le fetuu atamai o le tuuaga malama mo lona fetuu sema ?

¹² Ti na kau toe masau tua lua loa, o pati kiate ia : Kolea le uiga o laa oliveto e lua, ala e tuu o feofi ki takiaga lolo aulo e lua, ala e tafe mei ai le lolo gigila ?

¹³ Na tali mai loa a ia : Pe leaise ke iloa lola uiga ? Na kau tali loa : Leai, ei loku aliki !

¹⁴ Ti na pati mai loa a ia : Ko sa tagata ana e toka lua ala kua fakatapui ke tuu i mua o le Aliki o le malama nei katoa.