Sakalia 2 - Tosi Tapu

Tio o le tagata e too ia le va fua

¹ Na tagaki loa oku mata, o tio, ti ko leinei, na i ai se tagata leia na too ia i lona lima se va fua.

² Na kau pati loa : Pe ke ano kifea ? Ti na pati mai loa a ia : E kau ano o fua Selusalemi, ke tioi pe fia le loa mo le lau lasi ala e tonu ke maua e ia.

³ Ti ko leinei, na fakafeofi mai loa kiate au le aselo leia na masau mo au, ti na au loa se tasi ake aselo o fakafelavei mai kiate ia.

⁴ Ti na pati loa a ia ki le aselo leia na au : Makape o masau ki le tama lena, o pati : E liliu loa Selusalemi ko se kolo mavaa, o tupu ko le api o tagata mo manu ala e nonofo loa i ai ;

⁵ Ti na pati loa le Eteleno : E kau liliu loa kiate ia ko se kaua afi i lona takatakai katoa, ti e kau liliu loa ko lona kololia i loto malie o ona.

Kololia o Selusalemi i le temi ka au

⁶ Kotou sosola, kotou sosola i le fenua o le noleto ! E pati le Eteleno : Talie na kau fakamavetevete koutou ki potupotu e fa o le lagi, E pati le Eteleno.

⁷ Ke ke sola, Sione, A koe leia e nofo i le fale o le taine o Papilone !

⁸ Talie e folafola le Eteleno o kau tau, o pati : I le sili o le nea lena, e au loa le kololia ! Na kakau e ia a au ki puleaga ala na fakamativa ia koutou ; Talie ko leia e fafa kia koutou e fafa ki le tiloga o le mata o le Eteleno.

⁹ Ko leinei, e kau siki loku lima ki atu puleaga, Ti e lotou liliu loa ko le nea kai a latou ala na popula kia latou. Ti e kotou iloa loa ko le Eteleno o kau tau leia na kakau ia au.

¹⁰ Taine o Sione, Ke ke fai ni kalaga fakafiafia ti ke ke nekenekea ! Talie ko leinei, e kau au, ti e kau nofo loa i loto malie o ou, E pati le Eteleno.

¹¹ I le aso lena e api loa a puleaga ala e pipiki loa ki le Eteleno, Ti e liliu loa ko loku kakai. E kau nofo loa i loto malie o ou, Ti e ke iloa loa na kakau mai au kiate koe e le Eteleno o kau tau.

¹² E maua loa e le Eteleno a Suta ko lona vaega I le kele maokioki, Ti e toe filifili loa e ia Selusalemi.

¹³ Ke fakalologo kakai fuli i mua o le Eteleno ! Talie kua ala a ia o au mei lona nofoaga maokioki.