Sakalia 13 - Tosi Tapu

Fakamea o Iselaele

¹ I le aso lena, e fakamavaa loa se matapuna vai Ki le fale o Tavite ti mo le kakai o Selusalemi, Ki le agasala ti mo le kelekele.

² I le aso lena, e pati le Eteleno o kau tau : E kau tuuti loa i le fenua a igoa o taulaatua, O tupu ke aua na toe manatu kia latou ; E kau too loa i le fenua le kau polofeta loi mo le laumalie fakakelekele.

³ Kapau e kikite loa se tasi, E pati loa kiate ia lona tamana mo lona tinana, ala na fanaui ia a ia : E leaise ke mauli loa, talie e ke fakasa ia ni loi i le suafa o le Eteleno ! Ti e sukii loa a ia e lona tamana mo lona tinana ala na fanaui ia a ia Mo ka kikite loa a ia.

⁴ I le aso lena, e luma loa le kau polofeta ki alatou tio Mo ka lotou kikite loa, Ti e leaise lotou toe tui loa se taupulupulu fului manu o fai loi.

⁵ E pati loa le polofeta taki toka tasi : E leaise kau polofeta, E kau gaoi kele, Talie na kau maua ni kele talu mei loku tupu.

⁶ Ti kapau e vesili loa kiate ia : Pe au meifea a lavea ana i ou lima ? E tali loa a ia : Na kau maua latou i le fale o latou ala na alofa kiate au.

⁷ Seleta, oso ki laku tagata tausi manu Ti mo le tagata leia ko loku kaukau nea ! E pati le Eteleno. Taai le tagata tausi manu, Ti ke mavete a ovi ! Ti e kau fakamaliu loa loku lima kia latou ala e gagae.

⁸ I le fenua katoa, e pati le Eteleno, E motusi loa a vaega tolu e lua i le fenua katoa, Ti e toe loa le vaega tolu e tasi.

⁹ E kau tuku loa le vaega tolu lena ki le afi, Ti e kau fakamea loa a ia ofaipe le fakamea o le paaga, E kau fakamea loa a ia ofaipe le fakamea o le aulo i le afi. E fetapa loa a ia ki loku suafa, ti e kau tali loa kiate ia, E kau pati loa : Ko loku kakai ! Ti e pati loa a ia : Ko le Eteleno ko loku Atua !