Sakalia 12 - Tosi Tapu

E osoi loa Selusalemi, kae saofaki loa a Suta

¹ Folafola kikite, folafola mamafa a le Eteleno ki Iselaele. Koia e folafola ai le Eteleno, leia na folasi ia le atu lagi ti na fakatafito ia le kele, Leia na fau ia le laumalie o le tagata iate ia.

² Ko leinei, e kau fakaliliu loa Selusalemi ko se ipu fakatupu ulu vale Ki kakai fuli i ona tafatafa, Ti felaaki foki kia Suta i le aso leia e takatakai ai loa Selusalemi.

³ I le aso lena, e kau fakaliliu loa Selusalemi ko se fatu mamafa ki kakai fuli ; Ko latou fuli ala e siki ia loa a ia e lavelavea loa ; Ti e fakatasi loa a atu puleaga fuli o le malama nei kiate ia.

⁴ I le aso lena, e pati le Eteleno, E kau taai loa a osi fuli ki le ulu vale, Ti mo latou ala e eke i osi ki le valea. Kae e kau fakamavaa loa oku mata ki le fale o Suta, I le aso leia e kau tautea ai loa ki le kivi a osi fuli o kakai.

⁵ E pati loa a pule o Suta i olatou loto : E maua loa le makeke o le kakai o Selusalemi I le Eteleno o kau tau, lolatou Atua.

⁶ I le aso lena, e kau fakaliliu loa a pule o Suta Ke faipe se mata afi kaka i loto o se tuuga fafie, Pe se taume ulaula i se tuuga penu ; E lotou kai loa i le fetuu atamai mo le fetuu sema a kakai fuli ala e takatakai ia latou, Ti e nofo loa Selusalemi i lona nofoaga, i Selusalemi.

⁷ E uluaki saofaki loa e le Eteleno a falela o Suta, O tupu ke aua na malaga ki aluga o Suta Le kololia o le fale o Tavite, Le kololia o le kakai o Selusalemi.

⁸ I le aso lena, e puipui loa e le Eteleno le kakai o Selusalemi, Ti ko leia e gaegae ia latou e fai loa pe Tavite i le aso lena ; E fai loa le fale o Tavite pe le Atua, Pe le aselo o le Eteleno i olatou mua.

⁹ I le aso lena, E kau maumaui loa a atu puleaga fuli Ala e au loa o tau ki Selusalemi.

Fakasemala a Iselaele

¹⁰ Ti e kau liligi loa ki le fale o Tavite ti mo le kakai o Selusalemi Se laumalie o le alofa ti mo le tagi, Ti e lotou tagaki loa olatou mata kiate au, leia na lotou sokai ki le tao. E lotou tagi mamae loa kiate ia ofaipe le tagi ki se vosa fuatasi, E lotou tagi mamae loa kiate ia ofaipe le tagi ki se vosa uluaki.

¹¹ I le aso lena, e lasi loa le tagi laulau i Selusalemi, Ofaipe le tagi laulau kia Atatilimoni i le vaivailiua o Mekito.

¹² E tagi loa i le fenua katoa, i famili taki tasi : Le famili o le fale o Tavite, kese tagata ti kese fafine ; Le famili o le fale o Natane, kese tagata, ti kese fafine ;

¹³ Le famili o le fale o Levi, kese tagata, ti kese fafine. Le famili o Simei, kese tagata, ti kese fafine ;

¹⁴ Mo famili fuli ake ala, le famili taki tasi, Kese tagata, ti kese fafine.