Sakalia 10 - Tosi Tapu

E fakamakeke loa e le Atua a Suta mo Efalaimi

¹ Kotou kole ki le Eteleno le ua, le ua o le temi mafana ! E fakatupu loa e le Eteleno ni uila, Ti e tuku atu loa e ia kia koutou se ua lasi. E soli loa e ia ki le tagata taki toka tasi ni mouku i lana faisaga.

² Talie e noa a masau a telafimi, E fakasa ni loi e latou ala e kikite, E loi a moe miti ti e leaise uiga o alatou fakafimalie. Koia leia kua sese ai le kakai ofaipe se kau manu, Kua lotou malaia talie e leaise koi maua se tagata tausi manu.

³ Kua ula loku sausau ki le kau tausi manu, Ti e kau tautea loa a ovi tagata ; Talie kua fakatele le Eteleno o kau tau ki lana kau manu, le fale o Suta, Ti kua fakaliliu e ia a ia ko lana osi fakakololia i le tau ;

⁴ E ulu loa meiate ia le fatu agele, meiate ia le fao, meiate ia le kalolo tau, E ulu loa meiate ia a pule tau fuli, fakatasi.

⁵ E lotou fai loa pe ni kau toa i le tau o takatakafi latou ala e tau kia latou ofaipe le efu o le ala. E lotou tau loa, talie e nofo loa le Eteleno mo latou ; Kae e apele loa i le luma latou ala e eke i ni osi.

Ko le fakatasi o Iselaele

⁶ E kau fakamakeke loa le fale o Suta, Ti e kau saofaki loa le fale o Sosefo ; E kau toe aumai loa latou, talie e kau alofa loa kia latou, Ti e lotou fai loa pe ni iki ala na leaise kau tiaki ; Talie ko au ko le Eteleno, lolatou Atua, ti e kau tali loa latou.

⁷ E fai loa Efalaimi pe se tagata toa ; E maua loa e lolatou loto le fiafia leia e tuku e le vino ; E tio loa ki ai olatou vosa ti e lotou fiafia lasi loa, E fakavikiviki loa olatou loto ki le Eteleno.

⁸ E kau vekai ia loa latou ti e kau fakatasi loa latou, talie e kau totogi latou, Ti e lotou liuliuga loa ofaipe le temi mua.

⁹ E kau veteki loa latou i atu puleaga, Ti e lotou manatui loa au i mamao. E lotou mauli loa mo alatou fanau, ti e lotou toe liliu mai loa.

¹⁰ E kau aumai loa latou mei le fenua o Esipito, Ti e kau fakatasi loa latou mei Asilia ; E kau aumai loa latou ki le fenua o Kalaate ti mo le fenua o Lipane, Ti e leaise feauga loa le fenua kia latou.

¹¹ E lotou fakalaka loa i le tai o le mamae, e lotou taai loa a galu o le tai, Ti e malo loa a takele fuli o vaitafe. E taai loa ki lalo le fia nealasi o Asilia, Ti e puli loa le tokotoko fakasau o Esipito.

¹² E kau fakamakeke loa latou i le Eteleno, Ti e lotou saele loa i lona suafa, E folafola le Eteleno.