Sakalia 1 - Tosi Tapu

Kalaga ki le fakasemala

¹ I le masina valu o le fetuu lua o Taliusi, na tuku loa le folafola a le Eteleno ki le polofeta ko Sakalia, vosa o Pelekia, vosa o Ito, o pati :

² Na sausaua le Eteleno ki okoutou tamana.

³ Koia fakasa ai kia latou : E folafola le Eteleno o kau tau, o pati : Kotou toe liliu mai kiate au ; ti e kau toe liliu mai loa kia koutou, e folafola le Eteleno o kau tau.

⁴ Aua na kotou faipe okoutou tamana, ala na masau ki ai le kau polofeta i mua, o pati : E folafola le Eteleno o kau tau : Kotou maliu mei okoutou ala veveli, ti mo akoutou gaoi veveli ! Kae na leaise lotou fakalogo, ti na leaise lotou tokaga fua kiate au, e folafola le Eteleno.

⁵ Ko okoutou tamana, kofea latou ? Ti ko le kau polofeta, pe mafai ke lotou mauli o lee gato ?

⁶ Pe na leaise lave ki okoutou tamana aku folafola mo aku fakatotonu ala na kau tuku ki aku tagata fakasausau ko le kau polofeta ? Na lotou maliu mai, ti na lotou pati : Kua fai e le Eteleno o kau tau kia tatou o mulimuli ki le nea leia na fakapapau e ia ke fai kia tatou o mulimuli ki otou ala mo atatou gaoi.

Tio o osi

⁷ I le aso kau lua tupu fa o le masina kau agafulu tupu tasi, le masina o Sepate, i le fetuu lua o Taliusi, na tuku loa le folafola a le Eteleno kia Sakalia, vosa o Pelekia, vosa o Ito, le polofeta, o pati :

⁸ Na kau tio i le pouli, ti ko leinei, na eke se tagata i se osi kula, ti na tuu a ia i loto malie o ni mila i se ganea malumalu ; na tutuu i ona muli ni osi kula, mo ni osi uli, ti mo ni osi tea.

⁹ Na kau pati : Ko ai ma a osi anei, ei loku aliki ? Ti na pati loa le aselo leia na masau mai kiate au : E kau fakatio loa a koe ki le mauiga o osi anei.

¹⁰ Ko le tagata leia na tuu i loto malie o mila na masau loa, o pati : Ko latou ala na kakau mai e le Eteleno ke foli i le malama nei.

¹¹ Ti na lotou masau loa ki le aselo o le Eteleno, leia na tuu i loto malie o mila, ti na lotou pati loa : Kua motou foli i le malama nei katoa, ti ko leinei, e malolo mo tokamalie le malama nei katoa.

Fakapapau ki Selusalemi

¹² Ti na folafola loa le aselo o le Eteleno, o pati : Eteleno o kau tau, e kaku loa kiafea lau nofo e leaise ke alofa ki Selusalemi mo kolo o Suta, ala na ke sausaua ki ai talu mei fetuu e kau fitu ?

¹³ Na tali loa le Eteleno ki le aselo leia na masau mai kiate au ki ni kupu malilie ti mo ni kupu fakafimalie.

¹⁴ Ti na pati mai loa kiate au le aselo leia na masau mai kiate au : Kalaga, o pati : E folafola le Eteleno o kau tau, o pati : Kua kau finenonofo lasi o tupu ko Selusalemi mo Sione,

¹⁵ Ti kua kau mamae lasi ki puleaga fia nealasi ; talie na ikiiki fai loku mamae i mua, kae kua lotou fakalasi a ia.

¹⁶ Koia kua folafola ai le Eteleno, o pati : Kua kau toe liliu mai i loku alofa ki Selusalemi ; e toe fakatuu loa loku fale i ai, ti e toe toso loa le fua i Selusalemi.

¹⁷ Ke ke toe kalaga, o pati : Ko leinei le folafola a le Eteleno o kau tau : E toe maua loa e oku kolo olatou koloa o lasi ai ; e toe fakafimalie loa e le Eteleno a Sione, ti e toe filifili loa e ia Selusalemi.

Tio o tala e fa mo tagata fai ukamea e toka fa

¹⁸ Na tagaki loa oku mata, ti na kau tio, ti ko leinei, na i ai ni tala e fa.

¹⁹ Na kau pati loa ki le aselo leia na masau mai kiate au : Kolea le uiga o tala anei ? Ti na pati mai loa a ia kiate au : Ko tala ana ala na fakamavete ia a Suta, mo Iselaele, ti mo Selusalemi.

²⁰ Na toe fakatio loa au e le Eteleno ki ni tagata fai ukamea e toka fa.

²¹ Na kau pati loa : Kolea le nea leia e lotou au o fai ? Ti na pati loa a ia : Ko tala ana ala na fakamavete ia a Suta, ti ko tagata fai ukamea ana ala na au o fakaii kia latou, ti mo maumaui a tala o atu puleaga, ala na laga ia olatou tala ki le fenua o Suta, ke veteki ai lona kakai.