Pesalemo 99 - Tosi Tapu

Ko le Atua, le sau faitotonu mo maokioki

¹ E sau le Eteleno : e lulu a atu kakai ; E ekeeke a ia i aluga o selupino : e siga le malama nei.

² E lasi le Eteleno i Sione, E siki a ia i aluga o atu kakai fuli.

³ Ke fakamalo ki lou suafa lasi mo fakaii : E maokioki a ia !

⁴ Ke fakamalo ki le makeke o le sau leia e alofa ki le faitotonu ! E ke fakamakeke le maokioki, E ke fai le faitotonu mo le maoki i le fale o Sakopo.

⁵ Kotou fakafetai ki le Eteleno, lotatou Atua, Ti kotou punou i mua o lona tekiaga vae : E maokioki a ia !

⁶ Ko Moisese mo Alone i ana tagata faisakilifisio, Ti mo Samuele ia latou ala na fetapa ki lona suafa, Na faikole loa ki le Eteleno, ti na tali loa e ia latou.

⁷ Na masau loa a ia kia latou i le pou ao ; Na lotou tausi loa ana folafola, Ti mo le lao leia na soli loa e ia kia latou.

⁸ Eteleno, lomatou Atua, na ke tali loa latou, Na ke liliu loa kia latou ko se Atua leia e fakamolemole, Kae na ke tautea latou o tupu ko alatou agasala.

⁹ Kotou fakasa le mafimafi o le Eteleno, lotatou Atua, Ti kotou punou i lona mauga maokioki ! Talie e maokioki le Eteleno, lotatou Atua !