Pesalemo 98 - Tosi Tapu

Fakavikiviki a le malama nei ki le tui fakamaau faitotonu

¹ Pesalemo. Kotou sua ki le Eteleno se katiko foou ! Talie na fai e ia ni nea lalasi, Na tokoi kiate ia lona lima atamai mo lona lima maokioki.

² Na fakasa e le Eteleno lona fakamauli, Na fakasa e ia lona faitotonu ki mata o atu puleaga.

³ Na manatui e ia lona agamalie mo lona agatonu ki le fale o Iselaele, Na tio a potupotu fuli o le malama nei ki le fakamauli a lotatou Atua.

⁴ Kotou fai ni kalaga fakafiafia ki le Eteleno, Koutou fuli, kakai o le malama nei ! Kotou fakasa lokoutou fiafia lasi, ti kotou sua !

⁵ Kotou sua ki le Eteleno i le alepe ; Kotou sua ni katiko i le leo o le alepe !

⁶ I le leo o fakatagi pupusi mo le talai manu, Kotou fai ni kalaga fakafiafia i mua o le sau, le Eteleno !

⁷ Ke gugulu le tai mo nea fuli e maua i ai, Ke kalaga fakafiafia le malama nei mo latou ala e nonofo i ai,

⁸ Ke pasipasi a lima o vaitafe, Ke fai e atu mauga ni kalaga fakafiafia,

⁹ I mua o le Eteleno ! talie e au a ia ke fakamaau le malama nei ; E fakamaau loa e ia le malama nei i le faitotonu, Ti mo atu kakai i le maoki.