Pesalemo 97 - Tosi Tapu

Ko fakamaau a le Atua

¹ E sau le Eteleno ; ke fiafia lasi le malama nei ; Ke fiafia a atu motu mauke !

² E takatakai a ia e ao mo le fakapouli, Ko le faitotonu mo le maoki ko fakavae o lona ekeekeaga fakasau.

³ E saele le afi i ona mua, Ti e tutu e ia ona fili i ona tafatafa.

⁴ E fakamalama e ona uila le malama nei, E tio le malama nei ki ai ti e lulu ;

⁵ E okioki a mauga ofaipe se fa silo i mua o le Eteleno, I mua o le Aliki o le malama nei katoa.

⁶ E fakasa e le atu lagi lona faitotonu, Ti e tio a kakai fuli ki lona kololia.

⁷ E lotou luma fuli latou ala e tausi ki fakatata, Latou ala e fakakololia i taulaatua. E punou a atua fuli i ona mua.

⁸ E logo Sione kiate ia ti e fiafia, E nekenekea a taineliki o Suta, O tupu ko au fakamaauaga, ei Eteleno !

⁹ Talie ko koe, Eteleno ! E ke Taualuga i le malama nei katoa, E siki a koe ki aluga o atua fuli.

¹⁰ Koutou ala e alofa ki le Eteleno, kotou vesia ki le veli ! E taupau e ia a laumalie o lana kau agatonu, E saofaki e ia latou i le lima o le kau agaveli.

¹¹ E mu le malama ki le tagata agatonu, Ti mo le fiafia kia latou ala e loto sako.

¹² Kau agatonu, kotou fiafia i le Eteleno, Ti kotou sua ia koutou fakafetai lona maokioki !