Pesalemo 96 - Tosi Tapu

Sua ki le lasi mo le kololia o le Atua

¹ Kotou sua ki le Eteleno se katiko foou ! Kotou sua ki le Eteleno, koutou fuli, kakai o le malama nei !

² Kotou sua ki le Eteleno, kotou fakafetai ki lona suafa, Kotou fakasa lona fakamauli i aso taki tasi !

³ Kotou fakamatala lona kololia i le lotolotoga o atu puleaga, Ana gaoi fulumalie i le lotolotoga o atu kakai fuli !

⁴ Talie e lasi le Eteleno ti e gali ai mo le fakavikiviki, E fakaii a ia i aluga o atua fuli.

⁵ Talie ko atua fuli o atu puleaga ko ni taulaatua, Kae na fai e le Eteleno le lagi.

⁶ E tuu i ona mua le fakaapaapa mo le mafimafi, E nofo le kololia mo le mamalu i lona sagatualio.

⁷ Famili o atu kakai, kotou tuku ki le Eteleno, Kotou tuku ki le Eteleno le kololia mo le mafimafi !

⁸ Kotou tuku ki le Eteleno le kololia o tupu ko lona suafa ! Kotou ave ni moliga, ti kotou ulu ki ona lotoa !

⁹ Kotou punou i mua o le Eteleno mo ni kofu maokioki. Kotou lulu i ona mua, koutou fuli ko le kakai o le malama nei !

¹⁰ Kotou fakasa i le lotolotoga o atu puleaga : E sau le Eteleno ; Koia e tuu mau ai le malama nei, e leaise taugaoi a ia. E fakamaau e le Eteleno le kakai i le maoki.

¹¹ Ke fiafia le lagi, ti ke nekenekea le kele, Ke gugulu le tai mo nea fuli i ai.

¹² Ke fiafia le ulufenua mo nea fuli i ai, Ke kalaga fakafiafia a laakau fuli o vaomatua,

¹³ I mua o le Eteleno ! Talie e au a ia, Talie e au a ia ke fakamaau le malama nei ; E fakamaau loa e ia le malama nei i le faitotonu, Ti mo atu kakai o mulimuli ki lona agatonu.