Pesalemo 95 - Tosi Tapu

Fakaafe ki le atolasio

¹ Kotou au, tou sua i le nekenekea ki le Eteleno ! Tou kalaga fakafiafia ki le utu o lotatou fakamauli.

² Tou ano ki ona mua mo ni fakavikiviki, Tou fakagugulu ni katiko ki lona mauiga !

³ Talie ko le Eteleno ko se Atua lasi, Ko ia ko se sau lasi i aluga o atua fuli.

⁴ E too e ia i lona lima a potu loloto o le malama nei, Ti ko tumutumu o mauga a ana.

⁵ A ana le tai, ko ia leia na gaoi ia a ia ; Ko le kele foki, ko ona lima ala na gaoi ia a ia.

⁶ Kotou au, tou punou, ti tou fakataulalo i ona mua, Tou peluki otatou tuli i mua o le Eteleno, lotatou tupuaga !

⁷ Talie ko ia ko lotatou Atua, Ti ko tatou ko le kakai o lona lotoa manu, Le kau ovi leia e taki e lona lima… Io, i le aso nei kapau e mafai ke kotou logo ki lona leo !

⁸ Aua na kotou fakafefeka okoutou loto, ofaipe okoutou tamana i Melipa, ofaipe le aso o Masa, i le toafa,

⁹ Leia na lotou asiasii ai au, Ti na lotou fia ilo ai kiate au, logo kua lotou tio ki aku gaoi.

¹⁰ I le lolotoga o fetuu e kau fa na kau vesia loa ki le lanu lena, Ti na kau pati loa : Ko se kakai leia kua sese lona loto, E leaise lotou iloa oku ala.

¹¹ Koia na kau fakapapau ai i loku ita : E leaise lotou ulu loa ki loku malolo !