Pesalemo 94 - Tosi Tapu

Ko le totogi o le kau vale

¹ Ei Eteleno ko le Atua, a au le totogi ! Ei Atua, a au le totogi ! Ke ke sa mai !

² Ke ke tuu ki aluga, a koe ko le tui fakamaau o le malama nei ! Ke ke liufaki ki le kau fia nealasi o mulimuli ki alatou gaoi !

³ Ei Eteleno, e kaku loa kiafea le fia nealasi a le kau agaveli ! E kaku loa kiafea le malo a le kau agaveli ?

⁴ E lotou fai ni masau, e lotou masau matasoka ; E nekenekea latou fuli ala e fai ia le veli.

⁵ Eteleno ! E lotou takatakafi lou kakai, E lotou fakaveliveli lou tofiga ;

⁶ E lotou tamate le fafine lokonui mo le matapule, E lotou tukipooi a toe sala matua.

⁷ Ti e lotou pati : E leaise tio le Eteleno, E leaise tokaga le Atua o Sakopo !

⁸ Ke kotou tokaga, tagata valelea ! Kau sala atamai, koafea e kotou popoto ai loa ?

⁹ Ko leia na to ia le taliga, pe leaise logo loa a ia ? Ko leia na fai ia le mata, pe leaise tio loa a ia ?

¹⁰ Ko leia e tautea ia a atu puleaga, pe leaise tautea loa e ia, A ia leia e soli ia ki le tagata le atamai ?

¹¹ E iloa e le Eteleno a manatu a le tagata, E iloa e ia e lotou vaiga.

¹² Manuia le tagata leia e ke tautea, ei Eteleno ! Ti e ke ako ki lau lao,

¹³ O tupu ke fimalie a ia i le aso o le malaia, O kaku ki le kenu o le popoko ki le tagata agaveli !

¹⁴ Talie e leaise fakanoai e le Eteleno lona kakai, E leaise tiaki e ia lona tofiga ;

¹⁵ Talie e fai loa le fakamaau o mulimuli ki le faitotonu, Ti e fakamaoki loa ki ai latou fuli ala e agatonu i le loto.

¹⁶ Ko ai e tuu ake loa kiate au o taofi le kau agasala ? Ko ai e tokoi mai loa kiate au o taofi latou ala e fai ia le veli ?

¹⁷ Ka na leaise tokoi le Eteleno kiate au, Kua ifo loa loku laumalie ki le nofoaga o le kau mate.

¹⁸ Ka kau pati : E seke loku vae ! Ko lou agamalie, ei Eteleno, e taofi ia au.

¹⁹ Ka lasi a tuania iate au, Ko au fakapelepele e soli ia le fiafia ki loku laumalie.

²⁰ Pe fakaeke loa a koe e le kau agaveli ki lolatou ekeekeaga fakasau, Latou ala e fai ia ni fakakaukau veveli ki le lao ?

²¹ E lotou fakatasi ki le mauli o le tagata agatonu, Ti e lotou tautea noa le tagata saosaoa.

²² Kae ko le Eteleno ko loku maloloaga, Ko loku Atua ko loku utu ulufaga.

²³ E fakavilo loa e ia kia latou lalatou agasala, E maumaui loa e ia latou ki lalatou agasala ; Io, e maumaui loa latou e le Eteleno, lotatou Atua.