Pesalemo 92 - Tosi Tapu

Fakaafe ki le fakavikiviki

¹ Pesalemo. Katiko ki le aso o le sapato.

² E malie ke fakavikiviki ki le Eteleno, Ti ke sua fakafetai ki lou suafa, ei Eteleno !

³ Ke fakasa i le usu lou agamalie, Ti mo lou agatonu i lolotoga o pouli,

⁴ I le ukalele va kau agafulu ti mo le lute, I le leo o le alepe.

⁵ E ke fakafiafia au ki au gaoi, ei Eteleno ! Ti e kau sua i le fiafia lasi le gaoiaga o ou lima.

⁶ E lalasi ai au gaoi, ei Eteleno ! E loloto ai au manatu !

⁷ E leaise iloa e le tagata valea sana nea i ai, Ti e leaise tokaga fua ki ai le tagata sala atamai.

⁸ Ka tutupu le kau agaveli ofaipe le mutie, Ka se le kau agasala fuli ofaipe sei laakau, Se tupu ke maumaui latou o lee gato.

⁹ Kae ko koe, ko le Taualuga a koe, O lee gato, ei Eteleno !

¹⁰ Talie ko leinei, ko ou fili, ei Eteleno ! Talie ko leinei, e mamate ou fili ; Ko latou fuli ala e fai i le veli e fakamavetevete loa.

¹¹ Kae e ke soli mai kiate au le makeke o le pipi vao ; E takai au ki se lolo foou.

¹² E fiafia loku mata i le tio ki oku fili, Ti mo loku taliga i le logo ki le kau agaveli e vesia kiate au.

¹³ E tutupu sako le kau agatonu ofaipe le palemie, E lotou lalasi ofaipe le sete o Lipane.

¹⁴ Na to latou i le fale o le Eteleno, E lotou fua o lasi i lotoa o lotatou Atua ;

¹⁵ E lotou toe maua ia foki ni fua i lolatou temi matua, E lotou apele i le mauli ti e lotou sesega malie,

¹⁶ Ke fakasa ai ko le Eteleno e faitotonu. Ko ia ko loku utu, ti e leaise maua se veli iate ia.