Pesalemo 91 - Tosi Tapu

I le malu o le Taualuga

¹ Ko leia e nofo i le potu lilo o le Taualuga E malolo i le malu o le Mafimafi.

² E kau pati ki le Eteleno : Loku ulufaga mo loku kolo tau, Loku Atua leia e kau fanaki ki ai !

³ Talie ko ia leia e saofaki ia a koe i le kupega a le tagata faimasele, I le masaki mateia ti mo ana maumau.

⁴ E ofaki loa e ia a koe ki ona fului manu, Ti e ke maua loa se mumuniaga i lalo o ona lalo kapakau ; Ko lona agatonu ko se paletau ti ko se kofu tau.

⁵ E leaise ke i loa ki nea fakaii o le pouli, Pe ki le gasau leia e lele i le ao,

⁶ Pe ki le masaki veli leia e totolo i le pouli, Pe ki le vevela leia e to i le lalatea.

⁷ Pe mamate se tino afe i ou tafa, Ti mo se tino agafulu afe i lou lima atamai, E leaise soko loa a ia o ofi kiate koe.

⁸ Ko ou mata fua ala e tio loa, E ke tio loa ki le totogi o le kau agaveli.

⁹ Talie ko koe ko loku ulufaga, ei Eteleno ! E ke fai ki le Taualuga lou maloloaga !…

¹⁰ E leaise soko loa se veli kiate koe, E leaise fakafeofi loa se malaia ki lou falela.

¹¹ Talie e fakatotonu loa e ia ki lana kau aselo Ke taupau ia a koe i ou ala fuli.

¹² E lotou luluku loa a koe i olatou lima, Ke aua na tegea lou vae i se fa fatu.

¹³ E ke saele loa i aluga o le laione mo le gata velo, E ke takatakafi loa le uviki laione mo le talakone.

¹⁴ O tupu e alofa a ia kiate au, e kau fakamauli loa a ia ; E kau puipui loa a ia, talie e iloa e ia loku suafa.

¹⁵ E kalaga loa a ia kiate au, ti e kau tali loa kiate ia ; E kau nofo loa mo ia i le mamae ; E kau saofaki loa a ia, ti e kau fakakololia loa a ia.

¹⁶ E kau fakamakona loa a ia i se mauli fualoa, Ti e kau fakatio loa a ia ki loku fakamauli.