Pesalemo 90 - Tosi Tapu

Ko le toetoe o le mauli o le tagata

¹ Kole a Moisese, le tagata a le Atua. Aliki ! Na ke fai kia matou ko se ulufaga, I tautupu ki tautupu.

² I mua o le tupu o atu mauga, Ti mo mua o lau fakatupu le kele mo le malama nei, Mei le lee gato ki le lee gato, e ke Atua.

³ E ke fakaulu a tagata ki le efu, Ti e ke pati : Vosa o le tagata, kotou toe liliu ki le kele !

⁴ Talie ko fetuu e afe e fai ki ou mata Pe le aso nanafi, leia kua puli, Pe se lakaga o le pouli.

⁵ E ke ave latou ofaipe se moe miti, Leia, i le usu, kua puli ofaipe le mutie :

⁶ E se a ia i le usu, ti e tupu ake a ia o lasi ; E tuuti a ia i le afiafi, ti e malo a ia.

⁷ Kua tutu matou e lou ita, Ti e motou mamae i lou sausau.

⁸ E ke tuku i ou mua amatou agaveli, Ti e ke fakasa ki le malama o ou mata amatou agasala na fufu.

⁹ E pupuli vave omatou aso fuli o tupu ko lou sausau ; E motou tio ki le puli o omatou fetuu ofaipe se leo.

¹⁰ E kaku a aso o omatou fetuu ki fetuu e kau fitu, Ti e kaku latou ala e makeke ake ki fetuu e kau valu ; Ti ko le fia nealasi leia e motou maua i ai ko le pakia mo le mativa ; Talie puli vave le mauli, ti e tou lele ki le mate.

¹¹ Ko ai e tokaga ki le makeke o lou ita, Ti mo lau tautea, o mulimuli ki le i leia e tonu ke maua kiate koe ?

¹² Ako matou ke motou iloa le lau omatou aso, O tupu ke motou maua se loto leia e poto.

¹³ Toe liliu mai, Eteleno ! E kaku loa kiafea ?… Alofa mai ki au tagata fakasausau !

¹⁴ Fagai matou ke makona i usu fuli ki lou agamalie, Ti e motou nofo loa i lomatou mauli katoa i le fiafia mo le nekenekea.

¹⁵ Fakafiafia matou o fakatatau ki aso ala na ke fakaluma ai matou, Mo fetuu ala na motou tio ai ki le malaia.

¹⁶ Ke sa lau gaoiaga ki au tagata fakasausau, Ti mo lou kololia ki alatou fanau !

¹⁷ Ke nofo ia tatou le kalasia o le Eteleno, lotatou Atua ! Fakamakeke le gaoi o omatou lima ; Io, fakamakeke le gaoi o omatou lima !