Pesalemo 9 - Tosi Tapu

Fakamaau o le Atua ki atu puleaga

¹ Ki le pule o le kau sua. I le nota kiki. Pesalemo a Tavite.

² E kau fakafetai loa ki le Eteleno i loku loto katoa, Ti e kau fakamatala loa au gaoi malilie fuli.

³ E kau fai loa kiate koe le tupuaga o loku fiafia mo loku nekenekea, Ti e kau sua loa lou suafa, Atua Taualuga !

⁴ E solomuli oku fili, E lotou sisiga, e lotou mamate i ou mua.

⁵ Talie na ke puipui loku faitotonu mo laku gaoi, E ke eke i lou ekeekeaga fakasau o fakamaau i le faitotonu.

⁶ E ke tautea a atu puleaga, ti e ke maumaui le tagata agaveli ; E ke soloi olatou igoa o lee gato mo lee gato.

⁷ Kua pupuli a fili ! Ko maumau lee gato ata ! Na ke maumaui a kolo ! E leaise nea ke toe fakamanatu ai latou !…

⁸ E pule le Eteleno o lee gato, Kua fakatuu e ia lona ekeekeaga fakasau ki le fakamaau ;

⁹ E fakamaau e ia le malama nei i le faitotonu ; E fakamaau e ia a atu puleaga i le maoki.

¹⁰ Ko le Eteleno ko se mumuniaga ki le tagata leia e fakavelivelii, Ko se mumuniaga i le temi o le mamae.

¹¹ Ko latou ala e iloa ia lou suafa e fanaki kiate koe. Talie e leaise ke tiaki latou ala e afa ia a koe, ei Eteleno !

¹² Kotou sua ki le Eteleno, leia e nofo i Sione ; Kotou fakasa ana gaoi i lotolotoga o atu puleaga !

¹³ Talie e totogi e ia le toto ti e manatui e ia latou ala e mamae. E leaise galo iate ia alatou tagi.

¹⁴ Eteleno, alofa mai kiate au ! Tio ki loku mamae ia latou ala e vesia kiate au ! Too au i matapa o le mate,

¹⁵ O tupu ke kau fakasa ou fakavikiviki fuli I matapa o le taine o Sione, Ti ke kau fiafia ki lou fakamauli.

¹⁶ E vivilo a atu puleaga ki le popoko leia na lotou kenu, Ti e visia olatou vae i masele ala na lotou fufu.

¹⁷ E fakasa e le Eteleno lona anoaga totonu, e fakasa e ia lona faitotonu : E sai e ia le tagata agaveli ki le gaoi o ona lima. -Musika. -Manava.

¹⁸ E maliu le kau agaveli ki le nofoaga o le kau mate, Ti mo puleaga fuli ala e galoi ia le Atua.

¹⁹ Talie e leaise galo le tagata mativa o lee gato, Ti e leaise puli le amanaki malie o le kau mativa o lee gato.

²⁰ Eteleno, tuu ki aluga ! Ke aua na malo le tagata ! Ke fakamaau a atu puleaga i ou mua !

²¹ Eteleno, taai latou ki le i ! Ke iloa e atu puleaga ko ni tagata fai latou ! - Manava.