Pesalemo 89 - Tosi Tapu

Ko le sai a le Atua mo Tavite

¹ Katiko a Etane, le tagata Eselaki.

² E kau sua loa le agamalie o le Eteleno o lee gato ; E fakasa loa e loku gutu lou agatonu i tautupu mo tautupu.

³ Talie e kau pati : E maua e le agamalie ni fakatafito lee gato ; E ke fakatuu lou agatonu i le atu lagi.

⁴ Na kau fai se sai mo leia na kau filifili ; Ko leinei le nea leia na kau fakapapau kia Tavite, laku tagata fakasausau :

⁵ E kau fakamakeke loa lou sakoga o lee gato, Ti e kau fakatuu loa lou ekeekeaga fakasau i tautupu mo tautupu. - Manava.

⁶ Ei Eteleno, e fakafetai le atu lagi ki au gaoi malilie, Ti mo lou agatonu i le fakatasiga o le kau sagato.

⁷ Talie ko ai, i le lagi, e mafai ke fakatatau ki le Eteleno ? Ko ai e tatau mo koe i vosa o le Atua ?

⁸ E fakaii le Atua i le fakatasiga lasi a le kau aselo, E fakaii a ia kia latou fuli ala e takatakai ia a ia.

⁹ Eteleno, Atua o kau tau ! ko ai e mafimafi ofaipe koe, ei Eteleno ? E takatakai a koe e lou agatonu.

¹⁰ E ke pule ki le fia nealasi o le tai ; Ka malaga ona piau ki aluga, e ke tuku latou ki lalo.

¹¹ Na ke takafi loa Esipito ofaipe se mate, Na fakamavete ou fili i le mafimafi o lou lima.

¹² A au le atu lagi mo le kele, Ko koe leia na fakatuu ia le malama nei mo nea fuli ala e maua i ai.

¹³ Na ke fakatupu ia le noleto mo le saute ; E fiafia le Tapole mo le Elemoni i lou suafa.

¹⁴ E mafimafi lou lima, E makeke lou alofi lima, e taualuga lou lima atamai.

¹⁵ Ko le faitotonu mo le maokioki ko le fakavae o lou ekeekeaga fakasau. E tutuu le agamalie mo le agatonu i ou mua.

¹⁶ Manuia le kakai leia e iloa ia le leo o lau fakatagi pupusi ; E saele a ia i le malama o ou mata, ei Eteleno !

¹⁷ E fiafia tuumau a ia i lou suafa, E nekenekea a ia i lou faitotonu.

¹⁸ Talie ko le kololia a koe o lona makeke ; Ko lou kalasia leia e toe lagai ia lomatou makeke.

¹⁹ Talie ko le Eteleno ko lomatou paletau, Ko le Sagato o Iselaele ko lomatou sau a ia.

²⁰ Koia na ke folafola ai loa ki lou alofaaga i se tio, Ti na ke pati loa : Na kau tuku loku tokoi ki se tagata toa, Na kau siki ki aluga i loto malie o le kakai se tama tupulaga ;

²¹ Na kau maua ia Tavite, loku tagata fakasausau, Na kau pani a ia ki loku lolo tapu.

²² E poupou loa a ia e loku lima, E fakamakeke loa a ia e loku lima atamai.

²³ E leaise maua loa a ia e le fili, Ti e leaise pule loa le tagata agaveli kiate ia.

²⁴ E kau takatakafi loa i ona mua ona fili, E kau taai loa latou ala e vesia kiate ia.

²⁵ E nofo loa loku agatonu mo loku agamalie mo ia, Ti e malaga loa ki aluga lona makeke i loku suafa.

²⁶ E kau tuku loa lona lima ke pule ki le tai, Ti mo lona lima atamai ki atu vaitafe.

²⁷ Ko ia, e fetapa loa a ia kiate au : Ko koe ko loku tamana, Mo loku Atua ti mo le utu o loku fakamauli !

²⁸ Ti ko au, e kau fakaliliu loa a ia ko le uluaki tupu, Ko le sau taualuga lasi i sau o le malama nei.

²⁹ E kau taupau tuumau loa kiate ia loku agamalie, Ti e agatonu loa laku sai kiate ia ;

³⁰ E kau fakaliliu loa lona sakoga ke lee gato, Ti mo lona ekeekeaga fakasau ke tatau mo aso o le lagi.

³¹ Kapau e tiaki e ona vosa laku lao, Ti e leaise lotou saele o mulimuli ki aku fakatotonu,

³² Kapau e lotou maumaui aku pelesepeto, Ti e leaise lotou taupau aku folafola,

³³ E kau tautea loa ki le laakau alatou sala, Ti mo alatou agaveli ki ni fa ta ;

³⁴ Kae e leaise kau too loa iate ia loku agamalie, Ti e leaise kau fakafiti loa loku agatonu.

³⁵ E leaise kau maumaui loa laku sai, ti e leaise kau fetogi loa le nea leia na ulu mei oku laugutu.

³⁶ Na kau fakapapau tua tasi i loku maokioki : Pe kau loi loa kia Tavite ?

³⁷ E mauli loa lona sakoga o lee gato ; E tuu loa lona ekeekeaga fakasau i oku mua ofaipe le laa,

³⁸ Ofaipe le masina e tologa loa a ia o lee gato. E agatonu le tagata fakamaoki leia e nofo i le lagi. - Manava.

³⁹ Kae logo ai, na ke tiaki, na ke tekei kese ! Na ke ita ki lou filifiliia !

⁴⁰ Na ke fakanoai lau sai mo lau tagata fakasausau ; Na ke ti lona pala fakasau ki lalo ke kelekele.

⁴¹ Na ke soloi ki lalo ona paa fuli, Na ke maumaui ona kolo makeke fuli.

⁴² Ko latou fuli ala e fakalaka i le ala e kaia iate ia ; Kua liliu a ia ko se nea gologolo kia latou i ona tafatafa.

⁴³ Kua ke siki ki aluga le lima atamai o ona fili, ti kua ke fakafiafia ona fili fuli.

⁴⁴ Na ke fakasolomuli le mata o lana seleta, Ti na leaise ke tokoi kiate ia i le tau.

⁴⁵ Na ke fakagato lona mauiga, Ti na ke ti lona ekeekeaga fakasau ki le kele.

⁴⁶ Na ke fakatoetoe a aso o lona tupulaga, Na ke kofu a ia ki le luma. - Manava.

⁴⁷ Eteleno, pe kaku loa kiafea lau mumuni tuumau, Ti mo le ula o lou sausau ofaipe le afi ?

⁴⁸ Ke ke manatui le toetoe o loku mauli ! Pe na ke fakatupu a vosa fuli o le tagata ke tuku latou ki le noa !

⁴⁹ Pe i ai se tagata leia e mafai ke mauli kae leaise tio ki le mate, Leia e mafai ke saofaki ia lona laumalie mei le nofoaga o le kau mate ? - Manava.

⁵⁰ Kofea, Eteleno, ou agamalie i mua, Ala na ke fakapapau kia Tavite i lou agatonu ?

⁵¹ Aliki, manatui le luma o au tagata fakasausau ! Manatui e kau amo i loku fatafata a nukinuki a kakai toka api fuli ;

⁵² Ei Eteleno, manatui a lauveli o ou fili, Io, alatou lauveli ki lakaaga o lau filifiliia.

⁵³ Ke fakafetai ki le Eteleno o lee gato ! Amene ! Amene !