Pesalemo 88 - Tosi Tapu

Tagi i mamae

¹ Katiko. Pesalemo a vosa o Kole. Ki le pule o le kau sua. Ke sua i le fulute. Katiko a Emani, ko le tagata Eselaki.

² Eteleno, Atua ko loku fakamauli, E kau tagi i le ao mo le po i ou mua.

³ Ke kaku atu laku kole ki lou agaiaga ! Fakalogo mai lou taliga ki aku kolekole !

⁴ Talie kua makona loku laumalie i mamae, Ti e fakafeofi loku mauli ki le nofoaga o le kau mate.

⁵ Kua tuku au ki le atu o latou ala e ifo ki le popoko, Kua kau faipe se tagata leia e leaise koi maua sona makeke.

⁶ Kua kau moe mo le kau mate, O tatau mo latou ala kua mamate ti kua momoe i le tanuma, Mo latou ala e leaise koi ke manatui, Ala kua mavae i lou lima.

⁷ Na ke ti au ki se popoko loloto, Ki le fakapouli, ki vanu fakapouli.

⁸ Na vilo lou sausau kiate au, Ti na ke taotao au ki au galu fuli. - Manava.

⁹ Na ke fakamamao iate au oku kaukaunea, Na ke fakaliliu au kia latou ko se nea fakalialia ; Kua kau toka tasi i loku mamae, ti e leaise kau mafai le ulu ki fafo.

¹⁰ Kua gaegae oku mata o tupu ko le mamae, E kau tagi kiate koe i aso fuli, ei Eteleno ! E kau falo oku lima kiate koe.

¹¹ Pe ke fai ni milakulo kia latou ala kua mamate ? Pe tutuu ake le kau mate ki aluga o fakafetai kiate koe ? - Manava.

¹² Pe masau ki lou agamalie i loto o le tanuma, Ki lou agatonu i le nofoaga o le mate ?

¹³ Pe iloa au nea fakatalatupua i le fakapouli, Ti mo lou faitotonu i le nofoaga o le galoi ?

¹⁴ Ei Eteleno ! e kau tagi ki lau tokoi, Ti e pale atu i le usu laku kole kiate koe.

¹⁵ Kolea e ke tekei ai loku laumalie, Eteleno ? Kolea e ke fufu ai ou mata kiate au ?

¹⁶ E kau mamae ti e kau teiteiki ke mate talu mei loku ikiiki ; E kau mafaia i au nea fakaii, ti e kau tuania.

¹⁷ Kua kau malemo i ou sausau, Ti kua tapono loku gutu e au nea fakaii.

¹⁸ E lotou takatakai au i le aso katoa ofaipe ni vai, E lotou fakatasi fuli o taotao au.

¹⁹ Na ke fakamamao iate au oku kaukaunea mo oku kaukau soa ; Kua pupuli oku famili totonu.