Pesalemo 86 - Tosi Tapu

Tagi ki le manava alofa o le Atua

¹ Kole a Tavite. Eteleno, fakalogo mai lou taliga, tali mai ki laku kole ! Talie e kau mativa mo mamae.

² Taupau loku laumalie, talie e kau tausi malie ki le Atua ! Ei loku Atua, fakamauli lau tagata fakasausau leia e fanaki kiate koe !

³ Alofa mai kiate au, Aliki ! Talie e kau tagi kiate koe i le aso katoa.

⁴ Tuku le fiafia ki le loto o lau tagata fakasausau, Talie e kau siki loku laumalie kiate koe, Aliki.

⁵ Aliki, talie e ke agamalie, e ke fakamolemole, Ti e ke apele i le alofa kia latou fuli ala e tagi kiate koe.

⁶ Eteleno, fakalogo mai lou taliga ki laku kole, Tokaga mai ki le leo o aku tagi !

⁷ E kau fetapa kiate koe i le aso o loku mamae, Talie e ke tali aku kole.

⁸ Aliki, e leaise tatau se tasi mo koe i le kau atua, Ti e leaise tatau se nea mo au gaoiaga.

⁹ Ei Aliki, e au loa a atu puleaga fuli ala na ke fakatupu O punou i ou mua, ti mo fakakololia ki lou suafa.

¹⁰ Talie e ke lasi, ti e ke fai ni nea fakatalatupua ; Ko koe toka tasi, e ke Atua.

¹¹ Ei Eteleno, ako mai kiate au ou ala ; E kau saele loa i lou agatonu. Teuteu loku loto ke i ki lou suafa.

¹² E kau fakavikiviki loa kiate koe i loku loto katoa, Aliki, loku Atua ! Ti e kau fakakololia loa ki lou suafa o lee gato.

¹³ Talie e lasi ai lou agamalie kiate au, Ti kua ke saofaki loku laumalie mei le nofoaga loloto o le kau mate.

¹⁴ Ei Atua ! na tutuu mai ni tagata fia nealasi kiate au, Na loto se kau tagata toka api ki loku mauli ; E leaise lotou ave alatou manatu kiate koe.

¹⁵ Kae ko koe, Aliki, ko se Atua manava alofa mo agamalie a koe, Leia ke taofi fualoa lou sausau, e ke mou koloa i le agamalie mo le agatonu ;

¹⁶ Fulusi mai ou mata kiate au, ti ke alofa mai kiate au, Soli le makeke ki lau tagata fakasausau, Ti ke saofaki le vosa o lau fafine fakasausau !

¹⁷ Fai se fakamailoga kiate au, Ke tio ki ai oku fili ti ke lotou laulaunoa ! Talie e ke tokoi kiate au, ti e ke fakapelepele au, ei Eteleno !