Pesalemo 85 - Tosi Tapu

Kole ki le toe laga o Iselaele

¹ Ki le pule o le kau sua. O vosa o Kole. Pesalemo.

² Ei Eteleno, Kua ke loto malie ki lou fenua ! Kua ke toe aumai le kau popula o Sakopo ;

³ Kua ke fakamolemole ki le agaveli a lou kakai, Ti kua ke uufi alatou agasala fuli ; - Manava.

⁴ Kua ke too lou sausau katoa, ti kua ke tafoki mei le ulaula o lou sausau.

⁵ Ei Atua ko lomatou fakamauli, toe fakamauli matou ! Fakagato lou sausau kia matou !

⁶ Pe ke ita loa kia matou o lee gato ? Pe sosolo loa lou ita i tautupu fuli ?

⁷ Pe leaise ke toe aumai loa le mauli kia matou, o tupu ke fiafia lou kakai iate koe ?

⁸ Eteleno ! ke ke fakatio matou ki lou agamalie, Ti ke ke tuku mai kia matou lou mauli !

⁹ E kau fakalogo loa ki le nea leia e pati loa ki ai le Atua, le Eteleno ; Talie e masau a ia ki le tokamalie ki lona kakai mo lana kau agatonu, O tupu ke aua na lotou toe vilo ki valea.

¹⁰ Io, e ofi lona fakamauli kia latou ala e i kiate ia, O tupu ke nofo le kololia i lotatou fenua.

¹¹ E fetaulaki le agamalie mo le agatonu, E fesogiaki le faitotonu mo le tokamalie ;

¹² E somo ake le agatonu i le kele, Ti e tio mai le faitotonu mei le lagi.

¹³ Io, e soli loa e le Eteleno le manuia, Ti e tuku loa e lotatou kele ona fua.

¹⁴ E saele loa le faitotonu i ona mua, O tofa le ala o ona lakaaga.