Pesalemo 84 - Tosi Tapu

Tapuakina i le fale o le Atua

¹ Ki le pule o le kau sua. I le kitita. O vosa o Kole. Pesalemo.

² E alofaia ou nofoaga, Eteleno o kau tau !

³ E oli loku laumalie ti e tagi ki lotoa o le Eteleno ; Ko loku loto mo loku tino e fai ia ni kalaga ki le Atua mauli.

⁴ Io, e maua foki e le miti se fale, Ti mo le pekapeka se ofaga leia e tuku ai e ia ona uviki… io, ou aletale, Eteleno o kau tau ! Loku sau mo loku Atua !

⁵ Manuia latou ala e nonofo i lou fale ! Koi lotou mafai ke fakafetai kiate koe. - Manava.

⁶ Manuia latou ala e tuku lalatou fanaki kiate koe ! E lotou maua i olatou loto ni ala kua tofa.

⁷ Ka lotou ano i le toafa o Paka, E lotou fakaliliu a ia ko se ganea e apele i matapuna vai, Ti e fakaapele foki a ia e le ua ki ni tapuakina.

⁸ E asilisili lasi lolatou makeke i le lolotoga o le saele, Ti e lotou tutuu loa i mua o le Atua i Sione.

⁹ Eteleno, le Atua o kau tau, fakalogo mai ki laku kole ! Fakalogo mai lou taliga, Atua o Sakopo ! - Manava.

¹⁰ Ei Atua, ko koe ko lomatou paletau, Tio mai ki mata o lau filifiliia !

¹¹ E malie ake se aso e tasi i ou lotoa i ni aso e afe i tafa ; E malie ake kiate au laku tuu i le matapa o le fale o loku Atua, I laku nofo i falela o le agaveli.

¹² Talie ko le Eteleno Atua ko se laa ti ko se paletau : E soli e le Eteleno le kalasia mo le kololia, E leaise fakafiti e ia se nea malie kia latou ala e saele i le maoki.

¹³ Eteleno o kau tau ! Manuia le tagata leia e fanaki kiate koe !