Pesalemo 83 - Tosi Tapu

Kole o fakamalaia o fili o Iselaele

¹ Katiko. Pesalemo a Asafe.

² Ei Atua, aua na ke nofo fakalologo ! Aua na ke fakaleemu, ti aua na ke malolo, ei Atua !

³ Talie ko leinei, kua taugaoi ou fili, Ko latou ala e vesia kiate koe kua malaga olatou ulu ki aluga.

⁴ E lotou fai ki lou kakai ni fakatuutuu ala kua apele i le kaka, Ti e lotou fakakaukau veli fakatasi ki le kakai leia e ke malui.

⁵ E lotou pati : Kotou au, ke tou tamate latou i loto malie o atu puleaga, Ti ke aua na toe manatu loa ki le igoa o Iselaele !

⁶ E lotou fakakaukau i se loto e tasi, E lotou fai se sai ke agatuu kiate koe :

⁷ Ko falela o Etome, mo le faasiga o Isemaele, Mo Moape, mo le kau Akale,

⁸ Mo Kepale, mo Amone, mo Amaleke, Mo le kau Filisitini, mo le kakai o Tile ;

⁹ E kau foki le Asilia mo latou, E tokoi a ia ki fanau o Lote. - Manava.

¹⁰ Fai kia latou ofaipe Matiane Ofaipe Sisela, ofaipe Sapini i le vaitafe o Kisoni !

¹¹ Na maumaui latou i Ene-Toli, Ti na lotou liliu ko ni faikauga ke fakagako ai le kele.

¹² Fai ki olatou pule ofaipe Olepi mo Sepi, Ti mo olatou aliki fuli ofaipe Sepake mo Tesalemuna !

¹³ Talie e lotou pati : Ke tou too A nofoaga o le Atua !

¹⁴ Loku Atua ! Fakaliliu latou o tatau mo le sasataki, mo le mutie malo, leia e ave e le matagi,

¹⁵ Mo le afi leia e tutu ia le vaomatua, Mo le ula leia e tutu ia a mauga !

¹⁶ Tuli latou ki lau afa, Ti fakalulu latou ki lau sasataki !

¹⁷ Kofu olatou mata ki le luma, O tupu ke lotou afa lou suafa, ei Eteleno !

¹⁸ Ke lotou luma ti ke lotou i tuumau, Ke lotou laulaunoa ti ke lotou mamate !

¹⁹ Ke lotou iloa ko koe toka tasi leia e igoa ko le Eteleno, Ko koe ko le Taualuga i le malama nei katoa !