Pesalemo 81 - Tosi Tapu

Tokoi ki le fakalogo ki le Aliki

¹ Ki le pule o le kau sua. I ni nea faimusika va. A Asafe.

² Kotou sua i se fiafia lasi ki le Atua, lotatou makeke ! Kotou fai ni kalaga fiafia ki le Atua o Sakopo !

³ Kotou sua ni katiko, kotou fakagugulu le nafa, Mo le alepe logo malie, mo le lute !

⁴ Kotou pupusi le fakatagi pupusi i le masina foou, I le katoa o le masina, i lotatou aso lasi !

⁵ Talie ko se lao a ia ki Iselaele, Ko se fakatotonu a le Atua o Sakopo.

⁶ Na fakatuu loa e ia a ia ko se lao kia Sosefo, I le aso leia na saele ai loa a ia o taui le fenua o Esipito… E kau logo ki se leo leia na leaise kau iloa :

⁷ Na kau too le amoga i lona tuauma, Ti na tiaki e ona lima le kete.

⁸ Na ke kalaga i le mamae, ti na kau saofaki a koe ; Na kau tali kiate koe mei le mumuniaga o le mana ; Na kau asiasii a koe i vai o Melipa. - Manava.

⁹ Fakalogo mai, ei loku kakai ! ti e kau fakasa fakatomua loa kiate koe ; Iselaele, pe mafai fua ke ke fakalogo mai kiate au !

¹⁰ Ke aua na maua loa iate koe se atua kese ! Aua na ke punou loa i mua o ni atua kese !

¹¹ Ko au ko le Eteleno, lou Atua, leia na fakamavae ia a koe i le fenua o Esipito Fakamavaa lou gutu, ti e kau fakaapele loa a ia !

¹² Kae na leaise fakalogo fua loku kakai ki loku leo, Na leaise fakalogo fua Iselaele kiate au.

¹³ Koia na kau tuku ai latou ki oli o olatou loto, Ti na lotou mulimuli ki alatou manatu totonu.

¹⁴ Oi ! Ka na fakalogo mai fua loku kakai kiate au, Ka na saele fua Iselaele i oku ala !

¹⁵ I se kemo o le mata, e kau fakaluma ia loa olatou fili, E kau fakamaliu loa loku lima kia latou ala e vesia kia latou.

¹⁶ E fakalai loa kiate ia latou ala e vesia ki le Eteleno, Ti e fualoa loa le manuia o Iselaele o lee gato ;

¹⁷ E kau fagai loa a ia ki le fulumeto malie tukupau, Ti e kau fakamakona loa a ia ki le meli o le utu.