Pesalemo 80 - Tosi Tapu

Kole ki le laga o Iselaele

¹ Ki le pule o le kau sua. I lilio fakaaloalofa. A Asafe. Pesalemo.

² Fakalogo mai lou taliga, tagata tausi ovi o Iselaele, A koe leia e taki ia Sosefo ofaipe se kau manu ! Ke ke sa mai i lou fulumalie, A koe leia e ekeeke i vasa o selupino !

³ I mua o Efalaimi, mo Pesamino, mo Manase, fakasa lou makeke, Ti saele mai o fakamauli matou !

⁴ Ei Atua ! toe fakatuu ake matou ki aluga ! Fakagigila ou mata, ti e motou mauli loa !

⁵ Eteleno, Atua o kau tau ! E kaku loa kiafea lau itaita ki le kole a lou kakai ?

⁶ E ke fagai latou ki le pane o le tagi, E ke fakainu latou ki ni ipu kua apele i loimata.

⁷ E ke fakaliliu matou ko se nea ke visi ai ala e nonofo i omatou tafatafa, Ti e kakata omatou fili kia matou.

⁸ Ei Atua o kau tau, toe fakatuu ake matou ki aluga ! Fakagigila mai ou mata, ti e motou mauli loa !

⁹ Na ke taaki se vite i Esipito, Na ke kapu ni puleaga, kae na ke to a ia.

¹⁰ Na ke fakalauatea i ona mua, Na fakatupu e ia ni aka, ti na fakaapele e ia le fenua.

¹¹ Na fakamalumalu e ia a mauga ki lona malu, Ti na fai ona laa pe ni sete o le Atua ;

¹² Na folasi e ia ona laa o kaku ki le tai, Ti mo ona uli o kaku ki le vaitafe.

¹³ Kolea na ke maumaui ai ona a, o tupu ai le tau o ona fua e latou fuli ala e fakalaka i ona tafa ?

¹⁴ E sue a ia e le puaka vao o le vaomatua, Ti e kai a ia e manu o le ulu fenua.

¹⁵ Ei Atua o kau tau, toe liliu mai ! Tagaki mei lagi, o tio ! Fai se nea ki le vite leinei !

¹⁶ Puipui le nea leia na to e lou lima atamai, Ti mo le vosa leia na ke filifili !…

¹⁷ Na tutu a ia e le afi, kua tuuti a ia ki lalo ! E lotou mamate i mua o ou mata fakaii.

¹⁸ Ke teki lou lima ki le tagata o lou fetuu atamai, Ki le vosa o le tagata leia na ke filifili ma au !

¹⁹ Ti e leaise motou toe fakamamao loa iate koe. Toe fakamauli matou, ti e motou fetapa loa ki lou suafa.

²⁰ Eteleno, Atua o kau tau, toe fakatuu ake matou ki aluga ! Fakagigila mai ou mata, ti e motou mauli loa.