Pesalemo 79 - Tosi Tapu

Kole o uiga mo Selusalemi

¹ Pesalemo a Asafe. Ei Atua ! kua nofo a atu puleaga i lou tofiga, Kua lotou fakakelekele lou fale tapu maokioki, Kua lotou fakaliliu Selusalemi ko se tuuga fatu.

² Na lotou tuku a tino o au tagata fakasausau ke kai e manu lele o le lagi, Mo tino o latou ala na agatonu kiate koe ke kai e manu o le vao.

³ Na lotou liligi lolatou toto ofaipe se vai I le takatakai katoa o Selusalemi, Ti na leaise tasi ke tanu ia latou.

⁴ Kua motou liliu ko se nea fakalialia kia latou ala i omatou tafatafa, Ko se nea gologolo mo katai kia latou ala e takatakai ia matou.

⁵ E kaku loa kiafea, Eteleno ! lou ita tuumau, Ti mo le kaka o lou sausau ofaipe se afi ?

⁶ Liligi lou sausau ki atu puleaga ala e leaise iloa ia a koe, Ti mo puleaga sau ala e leaise fetapa ki lou suafa !

⁷ Talie na lotou kai Sakopo o oki, ti na maumaui lona nofoaga.

⁸ Aua na ke toe manatui amatou agaveveli i le temi kua sili ! Tuku ke au vave ou manava alofa ki omatou mua ! Talie kua motou fakaaloalofa ai.

⁹ Ei Atua, ko lomatou fakamauli, tokoi mai kia matou, o tupu ko le kololia o lou suafa ! Saofaki matou, ti fakamolemole kia amatou agasala, o tupu ko lou suafa !

¹⁰ Kolea e pati ai loa a atu puleaga : Kofea lolatou Atua ? Ke iloa i lamatou nofo i lotolotoga o atu puleaga, E ke totogi le toto o au tagata fakasausau, le toto leia na liligi !

¹¹ Ke kaku atu kiate koe a tagi a le kau popula ! Saofaki latou ala ka mamate ki lou lima mafimafi !

¹² Liufaki ki fatafata o latou ala i omatou tafatafa o tua fitu, A lauveli ala na lotou fai ia kiate koe, Aliki !

¹³ Ti ko matou, ala ko lou kakai, ko le kau manu o lou lotoa, E motou fakafetai loa kiate koe o lee gato ; E motou fakasa loa ou fakavikiviki i tautupu mo tautupu.