Pesalemo 78 - Tosi Tapu

Agatonu o le Atua i le isitolia o Iselaele

¹ Katiko a Asafe. Ei loku kakai, fakalogo mai ki aku akonaki ! Tuku mai lou taliga ki masau o loku gutu !

² E kau fakamavaa loku gutu i ni folafola fakatata, E kau fakasa le poto mei le temi afea.

³ Ko le nea leia na motou logo ki ai, le nea leia na motou iloa, Le nea leia na fakamatala mai e omatou tamana kia matou,

⁴ E leaise motou fufu loa a ia ki amatou fanau ; E motou fakasa loa ki le tautupu ka au a fakavikiviki o le Eteleno, Mo lona mafimafi, ti mo nea fakamanamana ala na fai e ia.

⁵ Na fakatuu e ia se fakamaoki ia Sakopo, Na tuku e ia se lao i Iselaele, Ti na fakatotonu e ia ki omatou tamana ke ako a ia ki alatou fanau,

⁶ O tupu ke iloa a ia e le tautupu muli, E fanau ala ka tupu loa, Ti ke lotou fakasa latou ki alatou fanau mo ka lotou lalasi loa,

⁷ O tupu ke lotou tuku lalatou fanaki ki le Atua, Ke aua na lotou galoi a gaoiaga a le Atua, Ti ke lotou tausi ana folafola,

⁸ O tupu ke aua na lotou faipe olatou tamana, Se lanu patigataa mo agatuu, Se lanu leia na leaise tuu mau lona loto, Ti na leaise agatonu lona laumalie ki le Atua.

⁹ Ko vosa o Efalaimi, ala na too masafu tau ti na faikalolo, Na sosola loa i le aso o le tau.

¹⁰ Na leaise lotou taupau loa le sai a le Atua, Ti na lotou fakafiti loa ke saele o mulimuli ki lana lao.

¹¹ Na lotou tuku loa ke galo a ana gaoi, Ana nea fulumalilie ala na fakatio e ia latou ki ai.

¹² I mua olatou tamana na fai e ia ni nea fakatalatupua I le fenua o Esipito, i toafa o Tesoane.

¹³ Na vaelua loa e ia le tai, ti na fakamavaa loa e ia kia latou se ala, Na fakatuuga loa e ia a vai ofaipe ni paa.

¹⁴ I le ao na taki loa e ia latou i se pou ao, Kae i le pouli katoa i se afi gigila.

¹⁵ Na fakamafaa loa e ia ni utu i le toafa, Ti na soli loa e ia kia latou ni vai ke lotou inu ;

¹⁶ Mei le utu na fakamapusi loa e ia ni matapuna vai, Ti na fakatafe loa e ia ni vai ofaipe ni vaitafe.

¹⁷ Kae na lotou soko atu aifai le agasala kiate ia, Le agatuu ki le Taualuga i le toafa.

¹⁸ Na lotou asiasii loa le Atua i olatou loto, O lotou kole se nea kai o mulimuli ki oli o lolatou loto.

¹⁹ Na lotou masau veli loa ki le Atua, Na lotou pati loa : Pe mafai loa e le Atua Ke fakatuu se laupapa kai i le toafa ?

²⁰ Ko leinei, na taai e ia le utu, ti na sali ni vai, Ti na tafe ni liua : Pe mafai loa ke soli foki e ia se pane, Pe ko se kanoi manu ki lona kakai ?

²¹ Na logo loa le Eteleno, ti na ita loa a ia ; Na mu loa se afi kia Sakopo, Ti na malaga loa se ita ki Iselaele,

²² Talie na leaise lotou tui loa ki le Atua, Talie na leaise lotou fanaki loa ki lana tokoi.

²³ Na fakatotonu loa e ia ki ao i aluga, Ti na fakamavaa loa e ia a matapa o le lagi ;

²⁴ Na fakato loa e ia le mane kia latou ke lotou kai, Na soli loa e ia kia latou le fulumeto o le lagi.

²⁵ Na lotou kai fuli loa ki le pane a le kau lalasi, Na aumai loa e ia kia latou se nea kai ke lotou makona ai.

²⁶ Na fakaagi loa e ia i le lagi le matagi o le potu esite, Ti na aumai loa e ia i lona mafimafi le matagi o le potu saute.

²⁷ Na fakato loa e ia kia latou le kanoi manu ofaipe le efu o le kele, Ti mo ni manu lele ofaipe le one o le mata tai ;

²⁸ Na fakamaluluku loa e ia latou ki loto malie o lolatou nofolaga, I le tafatafa katoa o olatou nofoaga.

²⁹ Na lotou kai loa, ti na lotou makokona loa : Na soli loa e le Atua kia latou le nea leia na lotou oli ki ai.

³⁰ Na leikiaise fimalie olatou loto, Ti na koi tuku alatou nea kai i olatou gutu,

³¹ Kae na malaga loa le sausau o le Atua kia latou ; Na taai loa e ia ki le mate latou ala na makeke malie, Na tamate loa e ia a tagata muli o Iselaele.

³² Kae logo a nea fuli ana, na lotou soko atu aifai le agasala, Ti na leaise lotou tui fua ki ana nea fakatalatupua.

³³ Na fakaoki loa e ia olatou aso i le nea vaiga, Ti mo olatou fetuu i le mamae.

³⁴ Ka taai e ia latou ki le mate, na lotou toe afa loa a ia. Na lotou toe liliu loa ki le Atua, o afa lana tokoi ;

³⁵ Na lotou manatu loa ko lolatou utu ko le Atua, Ko lolatou fakamauli ko le Atua taualuga.

³⁶ Kae na lotou kakaai a ia i olatou gutu, Ti na lotou loiloisi a ia i olatou alelo ;

³⁷ Na leaise maoki olatou loto kiate ia, Ti na leaise lotou agatonu ki lana sai.

³⁸ Kae, i lona manava alofa, e fakamolemole e ia le agaveli, ti e leaise maumaui e ia. E tau taofi e ia lona sausau, ti e leaise tuku e ia ke vilo lona mamafa katoa.

³⁹ Talie na manatui loa e ia ko latou ko ni tagata fai, Ko se tukumanava leia e ano ti e leaise toe au.

⁴⁰ Na tua fia lalatou agatuu kiate ia i le toafa ! Na tua fia lalatou fakatupu ia lona sausau i le potu lavaki !

⁴¹ Io, na leaise gato loa lalatou asiasii le Atua, Ti mo lalatou fakatupu ia le sausau o le Sagato o Iselaele.

⁴² Na leaise lotou manatui loa lona mafimafi, Le aso leia na saofaki ai loa e ia latou i le fili,

⁴³ A milakulo ala na fai loa e ia i Esipito, Ti mo ana gaoi fakatalatupua i le toafa o Tesoane.

⁴⁴ Na fakaliliu loa e ia olatou vaitafe o toto, Ti na leaise mafai loa ke lotou inu olatou vai.

⁴⁵ Na kakau loa e ia kia latou ni lago utiuti ala na kai ia loa latou, Ti mo ni kelenui ala na maumau ia loa latou.

⁴⁶ Na tuku loa e ia olatou fuata mo taukai ki unufe, Mo alatou faisaga ki seseivaka.

⁴⁷ Na fakamamate loa e ia olatou vite ki le ua fatu, Ti mo olatou sikomole ki le momoko.

⁴⁸ Na tuku loa e ia alatou kau manu lalasi ki le ua fefeka, Ti mo alatou kau manu liliki ki le fatuliki.

⁴⁹ Na laku loa e ia kia latou lona sausau kaka, Mo lona sausau lasi, mo lona mafaia, mo lona mamae, Mo se kau aselo toka api o le malaia.

⁵⁰ Na tuku loa e ia lona sausau ke vilo katoa, Na leaise fakamauli loa e ia olatou laumalie i le mate, Na tuku loa e ia olatou mauli ki le malaia veli ;

⁵¹ Na tamate loa e ia a uluaki tupu fuli o Esipito, A uluaki fua o le makeke i lalo o falela o Kami.

⁵² Kae na tuku loa e ia lona kakai ke ano ofaipe se kau ovi fafine, Na taki loa e ia latou i le toafa ofaipe se kau manu.

⁵³ Na taki loa e ia latou i le fimalie, O tupu ke aua na lotou i ki se nea, kae na malemo loa olatou fili i le tai.

⁵⁴ Na ave loa e ia latou ki lona koiga maokioki, Ki le mauga leia na totogi e lona lima atamai.

⁵⁵ Na kapu loa e ia i olatou mua a atu puleaga, Kae na vaevae loa e ia kia latou le fenua ke lotou maua, Ti na fakanofo loa e ia a faasiga o Iselaele i olatou nofoaga.

⁵⁶ Kae na lotou asiasii loa le Atua taualuga, ti na lotou agatuu loa kiate ia, Na leaise lotou tausi loa ana fakatotonu.

⁵⁷ Na lotou fakamamao loa ti na leaise lotou agatonu loa ; ofaipe olatou tamana, Na lotou toe liliu loa ki muli ofaipe se kalolo kaka.

⁵⁸ Na lotou fakatupu ia loa lona sausau ki olatou ganea taualuga, Ti na lotou fakatupu ia loa lona finenonofo ki olatou fakatata.

⁵⁹ Na logo loa le Atua, ti na itaita loa a ia ; Ti na tiaki fakamakeke loa e ia Iselaele.

⁶⁰ Na tiaki loa e ia le nofoaga o Silo, Le falela leia na nofo ai a ia i le lotolotoga o tagata ;

⁶¹ Na tuku loa e ia lona kololia ke ave popula, Ti mo lona agaiaga ki lima o le fili.

⁶² Na tuku loa e ia lona kakai ke tamate e le seleta, Ti na ita loa a ia ki lona tofiga.

⁶³ Na kai loa e le afi ona tagata muli, Ti na leaise avaga loa ona taupoou.

⁶⁴ Na mamate loa ona tagata faisakilifisio i le seleta, Ti na leaise tagi loa ona fafine lokonui.

⁶⁵ Na ala ake loa le Aliki ofaipe se tasi leia na moe, Ofaipe se toa leia na ofo ake i lona kona i le vino.

⁶⁶ Na taai loa e ia ona fili ala na sosola, Na fakakofu loa e ia latou ki se luma lee gato.

⁶⁷ Kae na tiaki loa e ia le falela o Sosefo, Ti na leaise filifili loa e ia le faasiga o Efalaimi.

⁶⁸ Na filifili loa e ia le faasiga o Suta, Le mauga o Sione leia na alofa a ia ki ai.

⁶⁹ Ti na laga loa e ia lona sagatualio ofaipe potu taualuga, Ofaipe le kele leia na fakatuu e ia o lee gato.

⁷⁰ Na filifili loa e ia Tavite, lana tagata fakasausau, Ti na too loa e ia mei lotoa manu ;

⁷¹ Na too loa e ia a ia i muli o ovi fafine ala na fakau ia olatou uviki, O tupu ke tausi e ia Sakopo, lona kakai, Ti mo Iselaele, lona tofiga.

⁷² Ti na fagai loa latou e Tavite i se loto agatonu, Ti na takitaki loa e ia latou ki ni lima poto.