Pesalemo 77 - Tosi Tapu

Ko gaoi lalasi a le Atua i le temi kua sili

¹ Ki le pule o le kau sua. Ia Setutune. Pesalemo a Asafe.

² E pale loku leo ki le Atua, ti e kau tagi ; E pale loku leo ki le Atua, ti e fakalogo mai loa a ia kiate au.

³ I le aso o loku mamae, e kau afa le Aliki ; I le pouli, e leaise toe manavanava le siki o oku lima kiate ia. E leaise tali e loku laumalie se fakapelepele.

⁴ E kau manatu ki le Atua, ti e kau tagi ; E kau metitasio, ti e mamae loku laumalie. - Manava.

⁵ E ke taofi oku laumata ke alaala ; Ti e leaise koi kau iloa se pati ke fai o tupu ko loku mamae.

⁶ E kau manatu ki aso afea, Ki fetuu kua sili.

⁷ E kau manatu ki aku katiko i le pouli, E kau fai ni vesili i loku loto, Ti e metitasio loku laumalie.

⁸ Pe tiaki loa e le Aliki o lee gato ? Pe leaise toe alofa loa a ia ?

⁹ Pe kua gato loa lona agamalie o lee gato ? Pe kua puli loa lana folafola o lee gato ?

¹⁰ Pe kua galo loa i le Atua ke alofa kia tatou ? Pe kua too loa e ia i lona sausau lona manava alofa ? - Manava.

¹¹ E kau pati : Ko le nea leia e kau mamae ai, E leaise koi tatau le lima atamai o le Taualuga…

¹² E kau toe fakamanatu loa a gaoiaga a le Eteleno, Talie e kau manatui au nea malilie i le temi afea ;

¹³ E kau masau loa ki au gaoiaga fuli, E kau fakamatala loa au gaoi lalasi.

¹⁴ Ei Atua ! e maokioki ou ala ; Ko le atua fea e lasi o tatau mo koe ?

¹⁵ Ko le Atua a koe leia e fai ia ni nea fakatalatupua ; Na ke fakasa lou mafimafi i le lotolotoga o kakai.

¹⁶ Na ke saofaki lou kakai ki lou lima, A vosa o Sakopo mo Sosefo. - Manava.

¹⁷ Ei Atua, na tio a atu vai kiate koe ! Io, na tio a atu vai kiate koe, na lotou lulu ; Na galulu loa a vanu loloto.

¹⁸ Na liligi loa e ao ni ua lalasi, Na gugulu loa le mana i ao, Ti na mafitifiti loa au gasau i potu fuli.

¹⁹ Na pa loa lou mana i le asesio, Na fakamalama loa e uila le malama nei katoa ; Na lulu loa le kele i le i.

²⁰ Na ke foa ia loa se ala i le tai, Se saeleaga i le takele o vai lalasi, Ti na leaise toe maua loa ou lakaaga.

²¹ Na ke taki lou kakai ofaipe se kau manu, I le lima o Moisese mo Alone.