Pesalemo 75 - Tosi Tapu

Ko le Atua ko le tui fakamaau taualuga

¹ Ki le pule o le kau sua. Aua na ke maumaui. Pesalemo a Asafe. Katiko.

² E motou fakafetai kiate koe, ei Atua ! e motou fakafetai kiate koe : E lasi lou suafa i omatou gutu ; E motou fakasa au nea malilie.

³ I le aso leia na kau fakatotonu, E kau fakamaau loa i le maoki.

⁴ E lulu le malama nei mo latou fuli ala e nonofo i ai : Ko au, e kau fakamakeke ona pou. - Manava.

⁵ E kau pati kia latou ala e fakakololia : Aua na kotou fakakololia ! Ki le kau agaveli : Aua na malaga ki aluga okoutou ulu !

⁶ Aua na kotou siki okoutou ulu ke taualuga, Aua na kotou masau matasoka !

⁷ Talie e leaise ko le potu esite, pe ko le potu uesite, Pe ko le toafa, e au mei ai le fakamauiga.

⁸ Kae ko leia e fakamaau ko le Atua : E tuku e ia ki lalo le tasi, ti e siki e ia ki aluga le tasi.

⁹ E too e le lima o le Eteleno se ipu, Leia e tatao ai se vino kua filo, Ti e liligi e ia a ia : E mimiti ti mo inu ki ai le kau agaveli fuli o le malama nei, o kaku ki le takele.

¹⁰ E kau fakasa loa a nea ana o lee gato ; E kau sua loa le mauiga o le Atua o Sakopo.

¹¹ E kau maumaui loa a makeke fuli o le kau agaveli ; E siki loa ki aluga a makeke o le tagata agatonu.