Pesalemo 74 - Tosi Tapu

Kole i le oki o le maumaui o le fale tapu

¹ Katiko a Asafe. Kolea, ei Atua, kua ke tiaki ai matou o lee gato ? Kolea kua ke ita ai ki le kau manu o lou lotoa ?

² Manatui lou kakai leia na ke totogi i mua ; Manatui a faasiga ala na ke totogi ko lou tofiga ! Manatui le mauga o Sione, leia na ke fai ai lou nofoaga ;

³ Saele ou vae ki ganea ana na maumaui tuumau ! Na maumaui e le fili a nea fuli i le sagatualio.

⁴ Na itaita latou ala na vesia kiate koe i lou fale tapu ; Na lotou fakatuu i ai alatou manumanu.

⁵ Na tio kia latou, na lotou faipe leia siki ia le toki i le vaomatua matotolu ;

⁶ Ti na vave ai lalatou maumaui a nea mauiga fuli o le fale Ki toki mo amale.

⁷ Na lotou tafu le afi i lou sagatualio ; Na lotou soloi mo fakakelekele le nofoaga o lou suafa.

⁸ Na lotou pati i olatou loto : ke tou maumaui fuli latou ! Na lotou tutu i le fenua katoa a potu tapu fuli.

⁹ E leaise koi motou tio ki omatou fakamailoga ; E leaise koi maua se polofeta, Ti e leaise tasi ia matou e iloa ia pe kaku loa kiafea…

¹⁰ Pe kaku loa kiafea, ei Atua, le lauveli a le tagata fakaveliveli, Le gologolo tuumau a le fili ki lou suafa ?

¹¹ Kolea e ke taofi ai lou lima, io, lou lima atamai ? Tatai a ia mei lou fatafata, ti ke maumaui !

¹² Talie ko le Atua ko loku sau talu mei temi afea : Ko ia leia e fai ia ni fakamauli i le malama nei.

¹³ Na ke vaelua le tai i lou mafimafi, Na ke fatifatii a ulu o le talakone lasi o le tai ;

¹⁴ Na ke takafi le ulu o le kolokotile, Na ke soli a ia ke kai e le kakai o le toafa.

¹⁵ Na ke fakatafe ni matapuna vai mo ni liua, Na ke fakamalo ni vaitafe ala na leaise mafai ke mamasa.

¹⁶ A au le ao, a au le pouli ; Na ke fakatupu le malama mo le laa.

¹⁷ Na ke fakatuu a koiga fuli o le malama nei, Na ke fakatuu le temi vevela mo le temi momoko.

¹⁸ Eteleno, manatui na lauveli le fili kiate koe, Ti na gologolo se kakai valea ki lou suafa !

¹⁹ Aua na ke tuku ki manu le laumalie o lau lupe, Aua na ke galo iate koe le mauli o lau kau fakaaloalofa o lee gato !

²⁰ Ke ke tokaga ki le sai ! Talie kua apele a poko fuli o le fenua i nofoaga o le kau tukipo.

²¹ Aua na ke tuku ke toe liliu i le luma le kakai leia na fakavelivelii ! Tuku ke fakafetai le kau fakaaloalofa mo le kau mativa ki lou suafa !

²² Tuu ki aluga, ei Atua, o puipui lau gaoiaga ! Manatu ki lauveli ala na fai kiate koe e le tagata valea i aso fuli !

²³ Aua na ke galo iate koe a kalaga fia nealasi o ou fili, Mo le maveuveu leia na fai e latou ala na agatuu kiate koe i aso fuli !