Pesalemo 72 - Tosi Tapu

Kololia o le puleaga o le Mesia

¹ A Salomone. Ei Atua, ke ke tuku au fakamaau ki le sau, Ti mo lou faitotonu ki le vosa o le sau !

² E fakamaau loa e ia lou kakai i le faitotonu, Ti mo lau kau mativa i le maoki.

³ E ave loa e mauga lalasi le tokamalie ki le kakai, Ti mo mauga liliki foki, o tupu ko lou faitotonu.

⁴ E fakamaau loa e ia i le faitotonu le kau fakaaloalofa o le kakai ; E saofaki loa e ia a fanau a le tagata mativa, Kae e takatakafi loa e ia le tagata fakamakeke.

⁵ E i loa kiate koe i le temi katoa e tuu ai loa le laa, I le temi katoa leia e sa ai loa le masina, i tautupu mo tautupu.

⁶ E fai loa a ia pe se ua leia e ifo ki se kele na faala, Ofaipe ni ua lalasi ala e fakavai ia le ulu fenua.

⁷ I ona aso e matalatala loa le tagata agatonu ofaipe se sei laakau, Ti e lasi loa le tokamalie o kaku ki le puli o le masina.

⁸ E pule loa a ia mei se tasi a tai ki le tasi a tai, Ti mei le vaitafe lasi o kaku ki potupotu o le malama nei.

⁹ I ona mua, e peluki loa e le kakai o le toafa olatou tuli, Ti e epo loa e ona fili le efu.

¹⁰ E totogi loa e sau o Talesisi mo sau o atu motu ni tukusau ; Ti e fai loa e sau o Sepa mo Sapa ni moliga.

¹¹ E punou loa a sau fuli i ona mua, E tausi loa a atu puleaga fuli kiate ia.

¹² Talie e saofaki loa e ia le mativa leia e tagi, Ti mo le tagata fakaaloalofa leia e leaise maua ia se tokoi.

¹³ E aloalofa loa a ia ki le gaegae mo le mativa, Ti e fakamauli loa e ia le mauli o le kau mativa ;

¹⁴ E fakalauatea loa e ia latou i le kaka mo le fakamakeke, Ti e mauiga loa lolatou toto ki ona mata.

¹⁵ E lotou mauli loa, ti e lotou soli loa kiate ia se aulo mei Sepa ; E lotou ulufaki tuumau loa a ia, e lotou fakamalo loa kiate ia i aso fuli.

¹⁶ E lasi loa le fulumeto i le fenua, i le tumutumu o mauga, Ti e taugaoi loa olatou taulu fulumeto ofaipe laakau o Lipane ; E se loa a tagata i kolo ofaipe le mutie o le fenua.

¹⁷ E tuu loa lona suafa o lee gato, O fualoa pe le laa e sosolo loa lona suafa ; Iate ia e fetapuaki loa leia ki leia, Ti pati loa a atu puleaga fuli kiate ia Manuia.

¹⁸ Ke fakafetai ki le Eteleno Atua, le Atua o Iselaele, Leia toka tasi e fai ia ni nea fakatalatupua !

¹⁹ Ke fakafetai ki lona suafa fakakololia o lee gato ! Ke apele le malama nei katoa i lona kololia ! Amene ! Amene !

²⁰ Oki o kole a Tavite, vosa o Isaia.