Pesalemo 71 - Tosi Tapu

Kole i le temi matua

¹ Eteleno ! e kau afa iate koe loku mumuniaga : Ke aua na ke tuku au ke luma i se aso !

² Fakamauli au i lou faitotonu, ti saofaki au ! Tuku mai lou taliga kiate au, ti ke saofaki au !

³ Ke ke liliu kiate au ko se utu, leia ko soku nofoaga makeke, Leia e feala ke kau sola tuumau ki ai ! Na ke fakatotonu ke saofaki au Talie ko koe ko loku utu mo loku kolo tau.

⁴ Loku Atua, saofaki au i le lima o le tagata agaveli, I le lima o le tagata agatuu mo itaita !

⁵ Talie ko laku amanaki malie ko koe, Aliki Eteleno ! E kau fanaki kiate koe talu mei loku ikiiki.

⁶ E kau fanaki kiate koe talu mei le manava o loku tinana. Ko koe leia na fakamavae ia au i le manava o loku tinana. Ko le tupuaga tuumau a koe o aku fakafetai.

⁷ E kau faipe se nea fakaofolele ki se toka api, Kae ko koe, ko loku ulufaga makeke.

⁸ Ke apele loku gutu i ou fakavikiviki, Ke fakakololia loku gutu kiate koe i aso fuli !

⁹ Aua na ke tiaki au i loku temi matua ; Ka puli oku makeke, aua na ke tiaki au !

¹⁰ Talie e masau veli oku fili kiate au, Ti e fakakaukau fakatasi latou ala e lamalama ia loku mauli,

¹¹ O pati : Kua tiaki a ia e le Atua ; Kotou tuli a ia, kotou tapo a ia ; e leaise tasi ke saofaki ia a ia.

¹² Ei Atua, aua na ke fakamamao iate au ! Loku Atua, au vave o saofaki au !

¹³ Ke lotou luma, ti ke lotou malaia latou ala e loto ki loku mauli ! Ke lotou apele i le luma mo le malaia, latou ala e afa ki loku mate !

¹⁴ Kae ko au, e kau amanaki malie tuumau loa, E kau asilisili fakafetai loa kiate koe.

¹⁵ E fakasa loa e loku gutu lou faitotonu, mo lou fakamauli i aso fuli, Talie e leaise kau iloa ola gatoaga.

¹⁶ E kau fakasa loa au gaoiaga mafimafi, Aliki Eteleno ! E kau fakamanatu loa lou faitotonu, io, a ia toka tasi.

¹⁷ Ei Atua ! na ke ako au talu mei loku ikiiki, Ti na kau fakasa au nea malilie o kaku mai ki le aso nei.

¹⁸ Aua na ke tiaki au, ei Atua ! tatau foki i le temi o loku matua veli, O tupu ke kau fakamasa lou makeke ki le tautupu leinei, Lou mafimafi i le tautupu ka au !

¹⁹ Ei Atua, e kaku lou faitotonu ki le lagi ; Na ke fai ni nea lalasi, ei Atua, ko ai e tatau mo koe ?

²⁰ Na ke asiasii matou ki ni mamae mo ni malaia ; Kae e ke toe soli mai loa le mauli kia matou, E ke toe paleaki ake loa matou i le vanu o le kele.

²¹ Ke ke toe lagai ki aluga loku kololia, Ke ke toe fakapelepelei au !

²² Ti e kau vikiviki loa kiate koe i le leo o le lute, e kau sua loa lou agatonu, ei loku Atua ; E kau siki loa a koe i le alepe, Sagato o Iselaele !

²³ E fiafia lasi loa oku laugutu i le sua kiate koe, Mo loku laumalie leia na ke saofaki.

²⁴ E fakasa loa e loku alelo lou faitotonu i aso fuli, Talie kua luma mo mamae latou ala e afa ki loku mate.