Pesalemo 7 - Tosi Tapu

Kole a leia e fakavelivelii

¹ Tagi a Tavite, leia na sua e ia ki le Eteleno, o uiga mo Kusi, tagata Pesamino.

² Eteleno, loku Atua, e kau afa iate koe loku mumuniaga, Saofaki au ia latou fuli ala e fakaveliveli mai kiate au, ti mo fakamauli au,

³ O tupu ke aua na lotou sae au, ofaipe se laione, Leia e sae ia kae leaise tasi ke saofaki ia.

⁴ Eteleno, loku Atua ! kapau na kau fai le nea lena, Kapau e maua se agaveli i oku lima,

⁵ Kapau na kau totogi veli ki leia na tokamalie mo au, Kapau na kau kaia leia na vesia noa kiate au,

⁶ Ke tuli au e le fili, ti ke tapo au e ia, Ti ke takafi e ia loku mauli ki le kele, Ti ke takafi e ia loku kololia ki le kele ! - Manava

⁷ Ei Eteleno, tuu ki aluga i lou sausau, Tuu ki aluga, o tupu ko le itaita o oku fili, Alaala o saofaki au ! Fakatotonu ke fai se fakamaau !

⁸ Ke takatakai a koe e le fakatasiga a atu puleaga ! Pale ki aluga, ki ganea taualuga !

⁹ E fakamaau e le Eteleno a atu puleaga : Fakamaau au, Eteleno, o mulimuli ki le faitotonu, O mulimuli ki loku maokioki mo loku mea !

¹⁰ Fakagato le kaka a le kau agaveli ! Kae fakatuu ke makeke le tagata agatonu, Atua faitotonu, a koe leia e ului ia a mafu mo ifiifi !

¹¹ E maua loku paletau i le Atua, Leia e fakamauli ia latou ala e loto sako.

¹² Ko le Atua ko se tui fakamaau faitotonu, Ti e itaita le Atua ki le kau agaveli i temi fuli.

¹³ Kapau e leaise tafoki le tagata agaveli, e fakamatakakai e ia lana seleta, E fafao e ia lana kalolo, ti e fakatusitusi e ia a ia ;

¹⁴ E fana e ia ni gasau mateia kiate ia, Ti e fakaliliu e ia ana gasau o ulaula.

¹⁵ Ko leinei, e teuteui e le tagata agaveli le veli ; E fakakaukaui e ia le agaveli, ti e fanaui e ia le kaka.

¹⁶ E fakamavaa e ia se popoko, e kenu e ia a ia, Ti e vilo a ia ki le popoko leia na fai e ia.

¹⁷ E toe vilo lana agaveli ki lona ulu, Ti e toe ifo lana agaitaita ki lona tumuaki.

¹⁸ E kau vikiviki loa ki le Eteleno o tupu ko lona faitotonu, Ti e kau sua loa le suafa o le Eteleno, o le Taualuga.