Pesalemo 69 - Tosi Tapu

Kole a le tagata agatonu

¹ Ki le pule o le kau sua. I lilio. A Tavite.

² Fakamauli au, ei Atua ! Talie kua ulu a vai ki loku mauli.

³ E kau ogo i le pela, e leaise mafai ke kau tuu ; Na kau vilo ki se pupua, ti e kau malemo i se vai lasi.

⁴ Kua kau pakia i le kalaga, kua malo loku fatakia, Kua fufula oku mata, i le talitali ki loku Atua.

⁵ E lotou toka api ake i fulu o loku ulu, Latou ala e vesia fakafuanoa mai kiate au ; E lotou makeke, latou ala e loto ki loku puli, Latou ala e fili noa kiate au. E tonu ke kau fakaliliu le nea leia na leaise kau kaia.

⁶ Ei Atua ! e ke iloa loku valea, Ti e leaise munia aku sala kiate koe.

⁷ Ko latou ala e tuku lalatou amanaki malie kiate koe, ke aua na luma o tupu ko au, Aliki, Eteleno o kau tau ! Ko latou ala e afa ia a koe, ke aua na luma o tupu ko au, Atua o Iselaele !

⁸ Talie ko koe leia e tupu ai laku amo ia le mele, Leia e tupu ai le uufi oku mata e le luma ;

⁹ Kua kau liliu ko se matapule ki oku fetaina, Ko se nea e leaise iloa ki vosa o loku tinana.

¹⁰ Talie kua tutu au e le mafi ki lou fale, Ti ko nukinuki a latou ala e lauveli kiate koe e vilo mai kiate au.

¹¹ E kau liligi ni loimata ti e kau sesunio, Koia leia e tupu ai loku luma.

¹² E kau tui se taga ko loku kofu, Ti e kau liliu ko lalatou nea katai.

¹³ E lauveli kiate au latou ala e tonatona i le matapa o le kolo, Ti e sua kiate au latou ala e konana i le kava.

¹⁴ Kae ko au, ei Eteleno, e kau fai kiate koe laku kole ! Ei Atua, ko le temi faigamalie leinei ke ke fakalogo mai kiate au, i lou agamalie lasi ! Ke ke fakamaoki mai kiate au lau tokoi !

¹⁵ Ke ke too au i le pela, ti ke aua na kau toe ogo ! Ke saofaki au i oku fili ti mo le popoko loloto !

¹⁶ Ke aua na kau toe malemo i se vai lasi, Ti ke aua na toe folo au e le moana, Ti ke aua na toe mapono le popoko iate au !

¹⁷ Ke ke tali au, Eteleno ! talie e lasi ai lou agamalie. Ke ke tagaki mai ou mata kiate au o fakatatau ki le lasi o lou manava alofa,

¹⁸ Kae aua na ke fufu ou mata ki lau tagata fakasausau ! Talie kau nofo i le mamae, ke ke vave o tali mai ki laku kole !

¹⁹ Ke ke fakafeofi mai ki loku laumalie, o saofaki a ia ! Saofaki au, o tupu ko oku fili !

²⁰ E ke iloa loku lauveli, mo loku luma, mo loku nukinuki ; E tutuu latou fuli e vesia kiate au i ou mua.

²¹ Kua fati loku loto i lauveli mai kiate au, ti kua kau masaki ; E kau talitali ki se alofa mai kiate au, kae noa ; Ki ni iki ke fakapelepele ia au, kae e leaise kau maua ia se tasi.

²² E lotou velo se au kona ki laku nea kai, Ti e lotou fakainu au ki se vinika ke puli ai loku fia inu.

²³ Ke liliu lolatou laupapa kai kia latou ko se masele Ti mo se kupega ke lotou pikiia ai !

²⁴ Ke fakapouli olatou mata ti ke aua na lotou toe tio ! Ke ke peluki tuumau ki lalo olatou tua !

²⁵ Ke ke liligi kia latou lou sausau, Ti ke tapo latou e lou ita kaka !

²⁶ Tuku ke maumaui olatou nofoaga, Ti ke aua na toe nofo se tasi i olatou falela !

²⁷ Talie e lotou fakaveliveli ki leia na ke taai, E lotou fakamatala a mamae o latou ala na ke tautea.

²⁸ Ke ke tosi alatou agaveli fuli, Ti ke aua na lotou kau ki lou manava alofa !

²⁹ Ke soloi latou i le tosi o le mauli, Ti ke aua na tosi latou mo le kau agatonu !

³⁰ Ko au, e kau mativa mo mamae : Ei Atua, ke toe lagai au e lau tokoi !

³¹ E kau fakafetai loa ki le suafa o le Atua i ni katiko, E kau sua loa kiate ia ni fakavikiviki.

³² E malie le nea lena ki le Eteleno, o lasi ake i se pipi tagata Mo ona tala ti mo ona taga vae.

³³ E tio ki le nea lena le kau mativa, ti e lotou fiafia loa : Ke mauli okoutou loto, koutou ala e afa ia le Atua !

³⁴ Talie e fakalogo le Eteleno ki le kau mativa, Ti e leaise fakanoa e ia lana kau popula.

³⁵ Ke fakafetai kiate ia le atu lagi mo le kele, Le tai mo nea fuli e taugaoi i ai !

³⁶ Talie e saofaki loa e le Atua a Sione, ti e laga loa e ia a kolo o Suta ; E toe nofo loa i ai, ti e toe maua loa a ia.

³⁷ E liliu loa a ia ko le tofiga o le sakoga o ana tagata fakasausau ; Ti ko latou ala e alofa ki lona suafa e maua loa i ai olatou nofoaga.