Pesalemo 68 - Tosi Tapu

Sua o le malo mo le kololia

¹ Ki le pule o le kau sua. A Tavite. Pesalemo. Katiko.

² E tuu le Atua ki aluga, e mavetevete ona fili, Ti e sosola latou e vesia kiate ia i ona mua.

³ Ofaipe le afu leia e viligia, e ke pusii latou ke puli ; Ofaipe le sua o le silo i le afi, e pupuli a tagata agaveli i mua o le Atua.

⁴ Kae e fiafia le kau agatonu, e lotou malo i mua o le Atua, E lotou nekenekea.

⁵ Kotou sua ki le Atua ! kotou fakafetai ki lona suafa ! Kotou tofa le ala ki leia e saele mai i le toafa ! Ko le Eteleno lona suafa : Kotou fiafia i ona mua !

⁶ Ko le tamana o fanau sala matua, ko le tausi o fafine sala avaga, Ko le Atua i lona nofoaga maokioki.

⁷ E soli e le Atua se famili kia latou ala na tiaki, E saofaki e ia le kau popula ti e fakafiafia e ia latou ; E gato fuai ki le kau agatuu e nonofo i ni potu malo.

⁸ Ei Atua ! I le aso leia na ke saele ai i mua o lou kakai, I le aso leia na ke saele ai i le toafa. - Manava.

⁹ Na galulu loa le malama nei, na tafe loa ni vai i le kele i mua o le Atua Na lulu Sinai i mua o le Atua, le Atua o Iselaele.

¹⁰ Na ke fakato ia loa se ua lasi lasi, ei Atua ! Na ke fakamakeke loa lou tofiga leia na gagae.

¹¹ Na fakatuu loa lou kakai lona nofoaga i le fenua Leia na ke teuteu, ei Atua, i lou agamalie ki le kau mativa.

¹² E tuku e le Aliki se folafola, Ti ko le kau fafine avelogo malilie e faipe se kau solia :

¹³ Ko sau o kau tau e sosola, e sosola, Ti ko le fafine leia e nofo i fale e tufa ia le koloa o le tau.

¹⁴ I le temi na kotou malolo ai i loto o fale manu, Na kofu e kapakau o le lupe le siliva, Na fefelo lona fului manu ofaipe le aulo.

¹⁵ I le aso na fakamavete ai e le Mafimafi a sau o le fenua, Na liliu loa le kele o tea ofaipe le nive o Tesalemone.

¹⁶ Mauga o le Atua, mauga o Pasani, Mauga e tumutumu mauke, mauga o Pasani,

¹⁷ Kolea, ei mauga e tumutumu mauke, E kotou finenonofo ai Ki le mauga leia na filifili e le Atua ke nofo ai ? Io, e fai loa e le Eteleno i ai lona nofoaga o lee gato.

¹⁸ Ko saliote a le Eteleno e lau i tino lua afe, Ti tino afe mo tino afe ; E nofo le Aliki i loto malie o latou, E tuu le Sinai i le sagatualio.

¹⁹ Na ke pale ki le potu taualuga, ti na ke ave ni kau popula, Na ke tali ni nea alofa ko ni tagata ; Ko latou ala na agatuu kiate koe e toe nonofo foki o ofi ki le Eteleno Atua.

²⁰ Ke fakafetai ki le Aliki i aso taki tasi ! Ka teki ni kavega mamafa kia matou, e fakamauli matou e le Atua. - Manava.

²¹ Koia, ko lotatou Atua, ko le Atua a ia o fakamauli, Ti ko le Eteleno, le Aliki, fakamauli ia matou mei le mate.

²² Io, e taai loa e le Atua le ulu o ona fili, le tumuaki o le ulu o latou ala e mauli i le agasala.

²³ E pati le Aliki : E kau toe aumai loa latou mei Pasani, E kau toe aumai loa latou mei le takele o le tai,

²⁴ O tupu ke fakauku lou vae i le toto, ti ke maua e le alelo o au kuli sona vaega i le fili.

²⁵ E lotou tio ki lau saele, ei Atua, Ki le polosesio o loku Atua, o loku sau, i le sagatualio.

²⁶ E muamua le kau sua, ti olo atu latou ala e faimusika, I loto malie ko taineliki o ta alatou tapulini.

²⁷ Kotou fakafetai ki le Atua i fakatasiga, Kotou fakafetai ki le Aliki, sakoga o Iselaele !

²⁸ E i ai Pesamino, le mulimuli, leia e pule kia latou, Mo pule o Suta mo olatou kau solia, Mo pule o Sapulone, mo pule o Nefetali.

²⁹ E fakatotonu e lou Atua ke ke makeke ; Fakamakeke, ei Atua, le nea leia na ke fai kia matou !

³⁰ Mei lou fale tapu, e ke pule ki Selusalemi ; E aumai loa e sau ni moliga kiate koe.

³¹ Ke ke tautea le kolokotile, Mo le kau pipi tagata mo le kau pipi tagata muli o atu kakai, Ala e tulolo mo ni piesi paaga ! Ke ke fakamavete a kakai ala e fiafia i le tau !

³² E au ni kau lalasi mei Esipito ; E makape mai Etiopia, o falo mai ona lima ki le Atua.

³³ Puleaga o le malama nei, kotou sua ki le Atua, Kotou fakafetai ki le Aliki ! - Manava.

³⁴ Kotou sua ki leia e saele mai i le atu lagi, i le atu lagi lee gato ! Ko leinei, e fakasa e ia lona leo, lona leo makeke.

³⁵ Kotou tuku le kololia ki le Atua ! E nofo lona agai i Iselaele, ti ko lona makeke i le atu lagi.

³⁶ Mei lou sagatualio, ei Atua ! e ke fakaii. E soli e le Atua o Iselaele le makeke mo le pule ki lona kakai. Ke fakafetai ki le Atua !