Pesalemo 65 - Tosi Tapu

Fakafetai ki le Atua o uiga mo ana nea malilie

¹ Ki le pule o le kau sua. Pesalemo a Tavite. Katiko.

² I le fanaki, ei Atua ! e fakafetai loa kiate koe i Sione, Ti e fakasoko loa a fakapapau fuli na fai kiate koe.

³ Ei koe, leia e fakalogo ki kole ! E au loa tagata fuli kiate koe,

⁴ E fakamamae au e agasala : E ke fakamolemole loa amatou sala !

⁵ Manuia leia e ke filifili ti e ke fakaulu ki lou agaiaga, O tupu ke nofo a ia i ou malae ! E motou makokona loa i le fiafia o lou fale, I le maokioki o lou fale tapu.

⁶ I lou agamalie, e ke tali ki amatou kole i ni nea fakamanamana, Atua o lomatou fakamauli, A koe ko le amanaki malie o atu puleaga o potupotu o le malama nei ti mo atu motu mamao o le tai !

⁷ E fakamakeke e ia a mauga ki lona makeke, E toi a ia ki le mafimafi ;

⁸ E lolomi e ia le gugulu o atu tai, le gugulu o olotou galu, Ti mo le maveuveu o atu puleaga.

⁹ Ko latou ala e nonofo i potupotu o le malama nei e i o tupu ko au nea fakamanamana ; E ke fakaapele le potu esite mo le potu uesite i le fiafia lasi.

¹⁰ E ke fakatele ki le kele ti e ke soli kiate ia le mau, E ke fakaapele a ia ki koloa. Ko le liua o le Atua e apele i le vai ; E ke teuteu le fulumeto ki le tagata, ti e ke fakagako le kele.

¹¹ E ke fakavai a faisaga, e ke fakamaluu le kele, E ke fakasusu a ia ki ni ua, e ke fakasomo le pulapula.

¹² E ke fakapala le fetuu ki au nea malilie, Ti e tafe le mau i ou lakaaga ;

¹³ E ke fakavai a kele o le toafa, Ti e takatakai a mauga liliki e le fiafia lasi.

¹⁴ E apele a faisaga sesega i ovi fafine, Ti e kofu e vaivailiua le fulumeto. E kalaga fakafiafia ti e sua fakafetai le natula katoa.