Pesalemo 63 - Tosi Tapu

Ko le fia inu ki le Atua

¹ Pesalemo a Tavite. I lana nofo i le toafa o Suta.

² Ei Atua ! ko koe ko loku Atua, e kau afa a koe. E fia inu loku laumalie kiate koe, e oli loku tino kiate koe I se kele malo, mo fia inu, mo sala vai.

³ Ke kau tio kiate koe i le sagatualio, Ke kau tio ki lou mafimafi mo lou kololia.

⁴ Talie e malie ake lou agamalie i le mauli, Koia e fakafetai ai oku laugutu kiate koe.

⁵ E kau fakamalo loa kiate koe i loku mauli katoa, E kau siki loa oku lima i lou suafa.

⁶ E makona loa loku laumalie ofaipe i ni nea kai gako mo kano malie, Ti e sua fiafia loa loku gutu o fakafetai kiate koe.

⁷ Ka kau manatu kiate koe i loku moeaga, E kau metitasio kiate koe i ola o le pouli.

⁸ Talie ko koe ko loku tokoi, Ti e kau nofo i le fiafia ai i le malu o ou kapakau.

⁹ E pipiki loku laumalie kiate koe ; E poupou au e lou lima atamai.

¹⁰ Kae ko latou ala e afa ke too loku mauli E ano loa ki potu loloto o le kele ;

¹¹ E tuku loa latou ki le seleta, E lotou liliu loa ko le nea kai a kuli vao.

¹² Ti e fiafia loa le sau i le Atua ; E fiafia loa latou fuli ala e fakakololia iate ia, Talie e tapono loa a gutu o le kau gutu loiloi.