Pesalemo 62 - Tosi Tapu

Ko le mumuniaga e tasi ko le Atua

¹ Ki le pule o le kau sua. Meia Setutune. Pesalemo a Tavite.

² Io, ko le Atua leia e fanaki ki ai loku laumalie ; Ko ia leia e au mei ai loku fakamauli.

³ Io, ko ia leia ko loku utu mo loku fakamauli, Loku maloloaga taualuga : e leaise kau siga loa.

⁴ E kaku loa kiafea lakotou oso ki se tagata, Lakoutou afa ke siga a ia ki lalo, Ofaipe se paa e matule, Ofaipe se a leia e maumaui ?

⁵ E lotou fakakaukau ke fakaifo a ia i lona tuulaga taualuga ; E lotou maua lolatou fiafia i le loi ; E lotou tapuaki i olatou gutu, Kae e lotou fakamalaia i olatou loto. - Manava.

⁶ Io, ei loku laumalie, ke ke fanaki ki le Atua ! Talie ko ia leia e au mei ai laku amanaki malie.

⁷ Io, ko ia leia ko loku utu ti mo loku fakamauli ; Ko loku maloloaga taualuga a ia : e leaise kau siga loa.

⁸ I le Atua e malolo ai loku fakamauli mo loku kololia ; Ko le utu o loku makeke mo loku ulufaga e nofo i le Atua.

⁹ Atu kakai, ke kotou fanaki tuumau kiate ia, Ke kotou liligi okoutou loto i ona mua ! Ko le Atua ko lotatou mumuniaga. - Manava.

¹⁰ Io, e vaiga a vosa o le tagata ! E loi a vosa o le tagata ! Ka teki latou fuli ki se fua, e lotou maamaa ake i se tukumanava.

¹¹ Ke aua na kotou fanaki ki le fakamakeke, Ti ke aua na kotou tuku se fanaki sala ki le kaia ; Ka tupu a koloa o lasi, Ke aua na pipiki ki ai okoutou loto.

¹² Na masau le Atua o tua tasi ; Na kau logo tua lua ki le nea leinei : Ko le makeke a le Atua a ia.

¹³ A au foki, Aliki ! le agamalie ; Talie e ke totogi ki le tagata taki tasi o mulimuli ki ana gaoi.