Pesalemo 61 - Tosi Tapu

Kole a le sau na sola

¹ Ki le pule o le kau sua. Ki nea faimusika va. A Tavite.

² Ei Atua ! fakalogo mai ki aku tagi, Tokaga mai ki laku kole !

³ E kau tagi kiate koe mei le potupotu o le malama nei, i le taomia o loku loto ; Ke ke taki au ki le utu leia e leaise mafai ke kau kaku ki ai !

⁴ Talie e ke fai kiate au pe se mumuniaga, Se tule makeke, i mua o le fili.

⁵ E kau fia nofo tuumau i lou falela o lee gato, O fakamalumalu i le malu o ou kapakau. - Manava.

⁶ Talie ko koe, ei Atua ! e ke tali aku fakaamuamu, E ke soli mai kiate au le tofiga o latou ala e i ki lou suafa.

⁷ Ke ke fakalasi a aso o le sau ; Ke tologa ona fetuu i tautupu mo tautupu !

⁸ Ke eke a ia i le ekeekeaga fakasau o lee gato i mua o le Atua ! Ke ke tuku ke tokaga lou agamalie mo lou agatonu kiate ia !

⁹ Ti e kau sua sosoko loa lou suafa, Ti e kau fai loa aku fakapapau i aso fuli.