Pesalemo 60 - Tosi Tapu

Kole i le oki o le lava

¹ Ki le pule o le kau sua. I le nota o le lilio fakaaloalofa. Imi a Tavite, ke ako.

² I lana tau ki le kau Silia o Mesopotamia ti mo le kau Silia o Tesopa, ala na tamate e Soape ni tagata Etomi e tino agafulu tupu lua afe i le vaivailiua o le patai.

³ Ei Atua ! na ke tiaki matou, na ke veteki matou, Na ke ita : Ke ke toe fakatuu matou ki aluga !

⁴ Na ke luui le malama nei, na ke saei a ia : Ke ke toe tapono ona pu, talie kua vave siga fua a ia !

⁵ Na ke fakatio lou kakai ki ni nea mamafa, Na ke fakainu matou ki se vino fakatupu galivale.

⁶ Na ke soli kia latou ala e i kiate koe se manumanu, Ke siki ki aluga o tupu ko le maoki. - Manava.

⁷ O tupu ke saofaki ou alofaaga, Ke ke fakamauli ki lou lima atamai, ti ke ke tali matou !

⁸ Na pati le Atua i lona maokioki : E kau malo loa, E kau vae loa Siseme, e kau fuafua loa le vaivailiua o Sukote ;

⁹ A aku Kalaate, a aku Manase ; Ko Efalaimi ko loku puloga tau, Ti ko Suta ko loku tokotoko fakasau ;

¹⁰ Ko Moape ko le fa tane leia e kau maanu ai ; E kau ti loku fa taka ki Etome ; Fenua o le kau Filisitini, ke ke fai ni kalaga fakafiafia kiate au !

¹¹ Ko ai e ave ia loa au ki le kolo tau ? Ko ai e taki ia loa au ki Etome ?

¹² Pe leaise ko koe, ei Atua, leia na tiaki ia matou, Leia na leaise koi ano, ei Atua, mo amatou kau tau ?

¹³ Ke ke tuku mai kia matou se tokoi i le mamae, Talie ko le tokoi a le tagata ko le vaiga katoa.

¹⁴ Fakatasi mo le Atua, e motou fai loa ni nea lalasi ; E takatakafi loa e ia omatou fili.