Pesalemo 6 - Tosi Tapu

Tagi ki le manava alofa o le Atua

¹ Ki le pule o le kau sua. Mo nea faimusika va. Ki le alepe va valu. Pesalemo a Tavite.

² Eteleno ! aua na ke tautea au i lou ita, Ti aua na ke taai au i lou ita lasi.

³ Eteleno, alofa mai kiate au, talie kua kau gaegae ; Fakamauli au, Eteleno, talie kua lulu oku ivi.

⁴ E mamae lasi foki loku loto ; Ti ko koe, Eteleno ! e kaku ki afea ?…

⁵ Toe liliu mai, Eteleno ! fakamauli loku laumalie ; Fakamauli au, o tupu ko lou manava alofa.

⁶ Talie e leaise toe manatu kiate koe leia kua mate. Ko ai e fakafetai loa kiate koe i le nofoaga o le kau mate ?

⁷ Kua kau gaegae i le tagi ; I po fuli e fakasusu loku moeaga e oku loimata, Ti e fakavai loku palepale e aku tagi.

⁸ Kua tutue oku mata i le lasi o loku mamae. Ti kua kau matua, o tupu ko latou fuli ala e fakaveliveli mai kiate au.

⁹ Kotou fakamamao atu iate au, koutou fuli ala e fai ia le veli ! Talie e logo le Eteleno ki le leo o oku loimata ;

¹⁰ E tali e le Eteleno aku tagi, Ti e kukumi e le Eteleno laku kole.

¹¹ Kua luma oku fili fuli, ti kua lotou maua e se i lasi. Kua lotou solomuli, ti kua lotou apele i le luma.