Pesalemo 59 - Tosi Tapu

Kole ki le fakamaau o le kau pagani

¹ Ki le pule o le kau sua. Aua na ke maumaui. Imi a Tavite. I le kakau e Saulo ke leo le fale ke tamate a ia.

² Loku Atua ! saofaki au i oku fili, Malui au ia latou ala kua malaga mai kiate au !

³ Saofaki au i le kau agaveli, Ti ke fakamauli au i tagata o le toto !

⁴ Talie ko leinei, e lotou lamalama au ke too loku mauli ; Kua fakatasi ni tagata itaita ke tamate au, Kae na leaise kau fai fua se sala, pe na kau agasala, ei Eteleno !

⁵ Logo ai loku mea, e lotou makape, e lotou teuteui ; Ke ke alaala, Eteleno, ke ke au kiate au, o tio !

⁶ Ko koe, Eteleno, Atua o kau tau, Atua o Iselaele, Tuu ki aluga, o tautea a atu puleaga fuli ! Aua na ke aloalofa fua ki se tasi o le kau agaveli lena ! - Manava.

⁷ E lotou au i afiafi fuli, e lotou ko ofaipe ni kuli, E lotou foli takai i le kolo.

⁸ Ko leinei, e mapusi i olatou gutu le veli, E pipiki ni seleta i olatou laugutu ; Talie e lotou pati : ko ai leia e logo ?

⁹ Kae ko koe, Eteleno, e ke kata kia latou, E ke gologolo ki atu puleaga fuli.

¹⁰ Pe feaki le lasi o lolatou makeke ! ko koe leia, Eteleno, e kau amanaki malie ki ai, Talie ko le Atua ko loku ulufaga taualuga.

¹¹ E au loku Atua ki oku mua i lona agamalie, E fakatio au e le Atua i le fiafia kia latou ala e fakaveliveli mai kiate au.

¹² Aua na ke tamate latou, talie na galoi e loku kakai lou malo. I lou mafimafi, tuku mua ke lotou sese noa, ti o ke fakavilo loa latou ki le kele, Aliki, ko lomatou paletau !

¹³ E agasala olatou gutu i masau fuli o olatou laugutu : Tuku ke tapo latou e le masele o lolatou fia nealasi ! Talie e lotou masau ata ki fakamalaia mo loi.

¹⁴ Ke ke maumaui latou i lou sausau, ke ke maumaui latou, ti ke lotou puli oki ! Ke lotou iloa e pule le Atua ki Sakopo, O kaku ki potupotu o le malama nei ! - Manava.

¹⁵ E lotou au i afiafi fuli, e lotou ko ofaipe ni kuli, E lotou foli takai i le kolo.

¹⁶ E lotou ano saele i potu fuli, o afa salatou nea kai, Ti e lotou momoe i le pouli kae leaise lotou makokona.

¹⁷ Kae ko au, e kau sua loa lou makeke ; Talu mei le usu, e kau fakafetai loa ki lou agamalie. Talie ko koe ko se maloloaga taualuga kiate au, Ko se solaaga i le aso o le mamae.

¹⁸ Ko koe ko loku makekeaga ! Ko koe leia e kau fakavikiviki loa ki ai, Talie ko le Atua, loku Atua agamalie katoa, ko loku maloloaga taualuga !