Pesalemo 58 - Tosi Tapu

Fakamaaui o tui fakamaau agaveli

¹ Ki le pule o le kau sua. Aua na ke maumaui. Pesalemo a Tavite.

² Pe feala ke fanaki kia koutou, mo ka kotou fakalologo ? Pe kotou fakamaau i le faitotonu, vosa o le tagata ?

³ Leai ai ! I le loto, e kotou fai ni agaveli, I le fenua ko okoutou lima ala na fakataga ia le agamakeke e fai ia a fakamaau.

⁴ E fakalialia le kau agaveli mei le manava o olatou tinana ; E sese le kau gutu loiloi mei lolatou vilo i le manava o olatou tinana.

⁵ E lotou maua se vai leia e kona ofaipe le vai kona o le gata, Io, ofaipe se gata velo tulituli leia e tapono ia lona taliga,

⁶ Leia e leaise logo ki le leo o le kau fai nea fakatemonio, Mo le leo o le tagata faimusika.

⁷ Ei Atua, fatifatii olatou nifo i olatou gutu ! Eteleno, taaki olatou kaunifo ala e faipe kaunifo o uviki laione !

⁸ Ke lotou puli noa ofaipe le vai leia e sali i le kele ! Ke lotou gae ofaipe le mutie leia e takatakafi !

⁹ Ke lotou maua le mauli o le esekaleko ! Leia e malo i lana totolo Ke aua na lotou tio ki le laa ofaipe le toe leia na fanaui kua mate !

¹⁰ I mua o le sauga o le afi na tafu ki se laakau talatala i akoutou kulo, Pe mata pe ulaula, e ave loa a ia e le asesio.

¹¹ E fiafia loa le tagata agatonu i lana tio ki le totogi ; E fufulu loa e ia ona vae i le toto o le kau agaveli.

¹² Ti e pati loa a tagata : Io, e i ai se fakapale ki le tagata agatonu ; Io, e i ai se Atua leia e fakamaau ia le malama nei.