Pesalemo 57 - Tosi Tapu

Fanaki i le temi faigataa

¹ Ki le pule o le kau sua. Aua na ke maumaui. Pesalemo a Tavite. I lana sola ki le ana, o tupu ko lona tuli e Saulo.

² Alofa mai kiate au, ei Atua, alofa mai kiate au ! Talie e fanaki loku laumalie kiate koe ; E kau afa se mumuniaga i le malu o ou kapakau, O kaku ki le oki o malaia.

³ E kau tagi ki le Atua taualuga, Ki le Atua leia e gaoi ki loku malie.

⁴ Ti e kakau loa e ia mei le lagi lona saofaki kiate au, Kae lolotoga lauveli kiate au leia e tuli ia au ; - Manava. E kakau mai loa e le Atua lona agamalie mo lona agatonu kiate au.

⁵ E nofo loku laumalie i lotolotoga o ni laione ; E kau moe i loto malie o latou ala e luluai ia le ula, I loto malie o ni tagata ala kua nifo ki le tao mo gasau, Ti kua alelo ki ni seleta matakakai.

⁶ Ei Atua, fakasa lou Taualuga leia e lasi ake i le atu lagi ! Fakamu lou kololia i le malama nei katoa !

⁷ Na lotou folasi se kupega i oku vae ; Na mapelu ki lalo loku laumalie. Na lotou kenu se popoko i oku mua, Na lotou vivilo ki ai. - Manava.

⁸ Kua makeke loku loto, ei Atua ! kua makeke loku loto : E kau sua loa, ti e kau fakagugulu loa aku nea faimusika.

⁹ Ke ke alaala, ei loku laumalie ! ke kolua alaala, ei laku lute mo laku alepe ! E kau fafagu loa le mafoata.

¹⁰ E kau fakavikiviki loa kiate koe i mua o le kakai, Aliki ! E kau sua loa kiate koe i mua o atu puleaga.

¹¹ Talie e lasi lou agamalie o kaku ki le lagi, Ti e kaku lou agatonu ki ao.

¹² Ei Atua, fakasa lou Taualuga leia e lasi ake i le atu lagi ! Fakamu lou kololia i le malama nei katoa !