Pesalemo 56 - Tosi Tapu

Ke ke fanaki tasi ki le Atua

¹ Ki le pule o le kau sua. I le nota o le lupe o telepate mamao. Imi a Tavite. I lona tapo e le kau Filisitini i Kate.

² Alofa mai kiate au, ei Atua ! talie e fakaveliveli ni tagata kiate au ; I le aso katoa e lotou taui au, e lotou fakamamae au.

³ I le aso katoa e tuli au e latou ala e fakafesagai kiate au : E lotou fakatasi ke taui au ti mo pulei au !

⁴ I le aso leia e kau i ai, E kau fanaki kiate koe.

⁵ E kau fakamalo loa ki le Atua, ki lana folafola ; E kau fanaki ki le Atua, e leaise kau tuania ia loa se nea : Kolea e mafai mai e se tagata kiate au ?

⁶ I aso fuli e lotou fulusi aku masau, Ti e lotou maua ni manatu veveli kiate au.

⁷ E lotou fakakaukau veli kiate au, e lotou lamalama au, e lotou tio ki oku lakaaga, Talie e lotou loto ki loku mauli.

⁸ I le lasi o lalatou agaveli, e lotou manatu e lotou sao loa : I lou sausau, ei Atua, ke ke laku latou ki le kele !

⁹ E ke lau a laka o loku mauli taka sola ; Ke ke tanaki oku loimata i lau utele : Pe leaise tosi latou i lau tosi ?

¹⁰ Ka kau tagi kiate koe, ti e solomuli oku fili ; E kau iloa e kau le Atua mo au.

¹¹ E kau fakamalo loa ki le Atua, i lana folafola ; E kau fakamalo loa ki le Eteleno, i lana folafola ;

¹² E kau fanaki ki le Atua, ti e leaise kau tuania ia se nea : Kolea e mafai ke fai mai e se tagata kiate au ?

¹³ Ei Atua ! e tonu ke kau fakasoko a fakapapau ala na kau fai kiate koe ; E kau momoli loa ni sakilifisio fakafetai kiate koe.

¹⁴ Talie na ke saofaki loku laumalie i le mate, Ti na leaise ke fakataga ke seke loku vae, O tupu ke kau saele i mua o le Atua, i le malama o le kau mauli.