Pesalemo 55 - Tosi Tapu

Ko le tagi a Tavite o tupu ko ona kaukaunea veli

¹ Ki le pule o le kau sua. Mo ni nea faimusika va. Katiko a Tavite.

² Ei Atua ! fakalogo mai lou taliga ki laku kole, Kae aua na ke mumuni i aku tagi kiate koe !

³ Ke ke fakalogo mai kiate au, ti ke ke tali mai kiate au ! E kau lauga i loku mamae, ti e kau tagi kalaga,

⁴ O tupu ko le leo o le fili ti mo le fakaveliveli a le tagata agaveli ; Talie kua la fakavilo mai kiate au le malaia, Ti e la tuli au i lola vesia kiate au.

⁵ E lulu loku loto iate au, Ti kua vilo kiate au a fakaii o le mate ;

⁶ Kua kaku kiate au le i mo le lulu, Ti kua takatakai au e le tuu tala.

⁷ E kau pati : Ka na kau maua a kapakau o le lupe, E kau lele loa, ti e kau maua loa le malolo ;

⁸ Ko leinei, e kau sola mamao loa, E kau ano loa o nofo i le toafa ; - Manava.

⁹ E kau sola vave loa, O gasolo ake i le matagi makeke mo le afa.

¹⁰ Aliki, fakanoai a fakatuutuu o oku fili, Ke ke veuki alatou masau ! Talie e kau tio i le kolo ki le agamakeke mo fefele ;

¹¹ E lotou fai le foli takai o le kolo i le ao mo le po i le kaua ; Ti kua nofo le agaveli mo le kaka i loto malie o le kolo ;

¹² E nofo le agaveli i ona loto malie, Ti e leaise koi mavae le kaia mo le kaka i ona nofoaga fakafenua.

¹³ E leaise ko se fili leia e lauveli kiate au, e kau kataki loa a ia ; Ti e leaise ko leia e fakafesagai mai kiate au e agatuu mai kiate au, e kau mumuni loa i ona mua.

¹⁴ Kae ko koe, leia e tatau mo au, Ko koe, leia ko loku alofaaga mo loku kaukaunea totonu !

¹⁵ Na ta nonofo fakatasi i le fealofani ti na ta felogoi malie ai ; Na ta ano fakatasi mo le kakai ki le fale o le Atua !

¹⁶ Ke fakamautoka latou e le mate, Ke lotou ifo mauli ki le nofoaga o le kau mate ! Talie e nofo le agaveli i olatou fale, i loto malie o latou.

¹⁷ Ti ko au, e kau tagi ki le Atua, Ti e fakamauli loa au e le Eteleno.

¹⁸ I le afiafi, mo le usu, mo le lalatea, e kau fakaamu ti e kau tagi, Ti e logo loa a ia ki loku leo.

¹⁹ E saofaki loa e ia au mo ka lotou fakafeofi mai kiate au, ti e soli mai loa e ia kiate au le tokamalie, Talie e lotou toka api ai kiate au.

²⁰ E logo loa le Atua, ti e tautea loa e ia latou, E ia leia e eke i lona ekeekeaga fakasau mei le lee gato ; - Manava. Talie leaise maua ia latou se fetogi, Ti e leaise lotou i ki le Atua.

²¹ E siki e ia lona lima kia latou ala na tokamalie mo ia, E maumaui e ia lana sai.

²² E sua malie ake lona gutu i le suka, Kae nofo le tau i lona loto ; E momole ake ana masau i le lolo, Kae ko ni seleta matakakai latou.

²³ Ke ke toe tuku lou mauli ki le Eteleno, ti e poupou loa e ia a koe, E leaise tuku loa e ia ke siga le tagata agatonu i se aso.

²⁴ Ti ko koe, ei Atua ! e ke fakaifo loa latou ki le takele o le popoko ; Io, e leaise kaku loa le kau tukipo mo le kau kaia ki le vaelua o olatou aso. Ko koe leia e kau fanaki ki ai.