Pesalemo 52 - Tosi Tapu

Ko le tautea o le tagata kaka

¹ Ki le pule o le kau sua. Katiko a Tavite.

² I le au o Toeke, le tagata Etome, o pati kia Saulo : Na ano Tavite ki le fale o Asimeleke.

³ Kolea e ke fakakololia ai i lou agaveli, tagata tukipo ? E tuu mau le agamalie o le Atua o lee gato.

⁴ E fakatupu e lou alelo le kaka ata, Ofaipe se tele matakakai, a koe leia ko se tagata kaka !

⁵ E ke manako ake ki le veli i le malie, Ki le loi i le maoki. - Manava.

⁶ E ke manako ki masau maumau fuli, Alelo kaka !

⁷ Koia e maumaui ai loa a koe e le Atua o lee gato, E too loa e ia a koe, ti e ave loa e ia a koe i lou falela ; E taaki loa e ia a koe i le kele o le kau mauli. - Manava.

⁸ E tio loa ki ai le kau agatonu, ti e lotou i loa, Ti e lotou kakata loa kiate ia :

⁹ Ko lena le tagata leia na leaise too ia le Atua ko lona ulufaga Kae na fanaki a ia ki le lasi o ona koloa Ti na malo o tupu ko lona kaka !

¹⁰ Kae ko au, e kau nofo i le fale o le Atua ofaipe se olive sesega, E kau fanaki ki le agamalie o le Atua i aso fuli, o lee gato.

¹¹ E kau fakafetai tuumau loa kiate koe, o tupu ko nea fuli ala na ke fai ; Ti e kau loto ke amanaki malie ki lou suafa, talie e malie a ia, I mua o lau kau agatonu.